(ФОТО) Што се случува со најпопуларните дивоградби на Пластичарска во Скопје

Излогот со порака „Внесете светлина во вашиот дом“ е тука, но продавницата за лустери која летово проработе во една од дивоградбите, вчера ја затекнавме со затворени врати

Од Општина Центар велат дека се во нов обид за уривање и на таа и на другата дивоградба во близина, каде одамна функционира „Муслим шоп“. Но, прво бараат асистенција од МВР да се испразнат објектите за потоа да се извршат решенијата за отстранување

Едниот објект се напојувал со струја од соседот, додека другиот имал инсталирано фотонапонска централа на кровот, велат од ЕВН, и додаваат дека никогаш не им дале согласност за приклучување на електричната мрежа

Чудни активности во двете познати дивоградби на Пластичарска во Скопје, општина Центар. По отворањето на продавницата „Муслим шоп“ во дивоградбата со стаклен излог, летово почна да работи дуќан и во соседната дивоградба (со зелена фасада).

Подолг период во бесправно изградениот објект со зелена фасада се складираше роба, а летово светнаа мноштво лустери и ламби. Тоа навести дека дел од просторот ќе се користи како продавница. Нема име, ниту некаков друг знак, само слоган „Внесете светлина во вашиот дом“.

Кога ја посетивме локацијата летово, додека бевме таму, во продавницата влезе и излезе единствено човек со послужавник. Се гледаше и нераспакувана роба.

Извесен период продавницата беше отворена, но вчера затекнавме затворени врати.

Историски дивоградби

Како редакција, случаите со оваа дивоградба и со уште една близу неа ги следиме речиси две години. Почнавме во исто време со првите неуспешни обиди да се срушат тогашните темели подигнати од непознат сторител. Следевме и објавувавме како се затвора карабина, се ставаат прозорци и фасада, се лепат плочки.

Втората зграда дочекавме и да ја „отвориме“. Таму на приземјето работи продавницата „Муслим шоп“.

Другата дивоградба на Пластичарска, архивска фотографија

Вчера, и пред излогот на „Муслим шоп“ затекнавме отпад. Додека бевме на локацијата, ниту некој влезе ниту излезе од објектот.

Кога се отвори, се јавивме во „Муслим шоп“. Телефонски ни кажаа дека се кираџии, а не газди и дека не знаеле оти објектот е бесправна градба. Потоа не одговараа на нашите дополнителни прашања, но дуќанот продолжи да работи. Дојдовме и како муштерии, влеговме и купивме козметички производ. Не добивме фискална сметка.

Објектот каде што се всели „Муслим шоп“, според податоците од Катастарот кога се градеше објектот, е на државна земја. Но, на тоа место имало објект од околу 120 квадрати, кој се води на извесен Ахмед Динарица. Тој објект бил легализиран, за потоа на местото нелегално да никне денешното многу поголемо здание.

Другата дивоградба, пак, онаа со зелена фасада, ем е на државно земјиште ем за тоа место нема записи дека некогаш имало објект.

Центар повторно бара асистенција од полицијата

Општината двапати се обиде да ги урива објектите. Првиот пат, како што јавно посочи градоначалникот Горан Герасимовски, акцијата пропадна оти од МВР им јавиле дека немаат полицајци да асистираат. Герасимовски е кадар на СДСМ, а во тој момент со МВР раководеше Оливер Спасовски, исто така кадар на СДСМ.

Вториот пат полицијата обезбеди асистенција, но во очи на акција за уривање Градежниот инспекторат ја одзеде документацијата од Центар, по наводна анонимна претставка. Со Градежниот инспекторат раководеше кадар на ДУИ, коалициски партнер на СДСМ. Шефот на инспекторатот, со записник, ја задолжи Општината да ја повтори цела процедура. Наместо тоа, Општина Центар пред Управен суд го тужеше Државниот градежен инспекторат, но тужбата пропадна со процедурално образложение.

Од Инспекторатот тврдеа дека Општината сама се заплеткала – наместо тужба, требало да поднесат приговор против записникот. Така, кажаа тогаш од Инспекторатот, би биле должни да се произнесат. Од Општината го сторија и тоа. Во меѓувреме, централната власт се смени, а на терен сè остана исто.

Па, уште еднаш до надлежната Општина Центар поставивме две прашања – до каде е процедурата за уривање и доколку се откажале од таа намера, каков е планот за понатамошно постапување со дивоградбите?

Сега локалната власт вели дека повторно бара асистенција од МВР, а го известиле и Обвинителството дека кираџиите мора да се селат оти се донесени решенија за отстранување на дивоградбите.

„За предметните парцели Секторот за инспекциски работи на Општина Центар преку градежен инспектор има донесено записници, решенија за отстранување како заклучоци за извршување. Бидејќи во објектите што се предмет на инспекциската постапка има лица што вршат трговска дејност, Општина Центар побара асистенција од МВР, а известено е и Јавното обвинителство со цел да се испразнат објектите за да може да се пристапи кон извршување на решенијата за отстранување на дивоградбите“,
велат од Општина Центар за „360 степени“.

И полицијата потврдува дека се во констултација со Општината и дека на секое барање за асистенција ќе одговорат согласно законот. Интересно е што сега Горан Герасимовски од СДСМ – актуелен градоначалник кој е во трка за нов мандат, барем на хартија, има поддршка од ресорот со кој раководи Панче Тошковски од редовите на ВМРО-ДПМНЕ.

„СВР Скопје во консултација со ЈО во месец август 2025 година одржа работен состанок со претставници од Општината со цел договарање на динамика согласно барањето за асистенција. Општината е задолжена во следниов период согласно законот да ги почне постапките за известување на споменатите адреси како би дошло до селење на фирмите. Секако, за секое барање за асистенција од СВР Скопје ќе биде соодветно одговорено согласно Закон за полиција“,
ни одговорија од МВР.

Со дивоградбите одамна е запознаено и Обвинителството. И тие утврдиле оти првата дивоградба, (таа со зелена фасада во која сега се отвори продавница за лустери) – во целост е изградена на државно земјиште, но „инвеститорот“ е непознат до овој момент. Другата дивоградба, пак, онаа во која одамна се вселени „Муслим шоп“, делумно е во државна сопственост, а делумно во сопственост на физичко лице кое престојува во Швајцарија.

„За објектот на КП 4289, со дејствијата преземени од надлежниот јавен обвинител се утврди дека претставува дивоградба изградена во целост на државно земјиште, меѓутоа инвеститорот не е утврден до овој момент. За наведениот објект, Општина Центар побара асистенција од Министерството за внатрешни работи – СВР Скопје за отстранување на објектот изграден без одобрение за градење. Договорена е соодветна динамика за отстранување, а Општината е задолжена да ја започне постапката за известување на корисниците на објектот.

Во однос на објектот на КП 4291, се утврди дека станува збор за дивоградба и е изграден на земјиште кое делумно е во државна сопственост, а делумно во сопственост на физичко лице со германско државјанство, кое во моментов според последни податоци престојува во Швајцарија. Основното јавно обвинителство Скопје, преку каналите за меѓународна правна помош на Истражниот центар на обвинителството, испрати барање за соодветни проверки во однос на ова лице. И во однос на овој објект Обвинителството е усно известено дека Општината ќе започне постапка за известување дека нелегалниот објект ќе биде отстранет“,

велат за „360 степени“ од Обвинителството.

Фото од мапата на Агенција за катастар на недвижности

И додека институциите се координираат, ЕВН излезе на терен. Оттаму за „360 степени“ велат дека при контролите утврдиле дека едниот објект се напојувал со струја од соседот, додека другиот инсталирал фотонапонска централа на покривот.

„За овие објекти, компанијата никогаш нема издадено Согласност за приклучување на електричната мрежа. По завршување на контролите, констатирано е следното: едниот објект (‘Муслим шоп’) има инсталирано фотонапонска централа на кровната конструкција. Другиот објект се напојува преку соседниот објект, а сопственикот е известен дека според Мрежни правила и без согласност од Операторот на дистрибутивниот систем, не смее да користи електрична енергија, по што ќе следуваат дополнителни мерки“,
велат од Електродистрибуција.

Дивоградби има во речиси секоја општина. Заедничко за сите е што брзо никнуваат, а бавно доаѓа до разврски и покрај очигледното газење на законите.

ПОВЕЌЕ НА ТЕМА ДИВОГРАДБИ: