Првите и најзасегнати соседи – станарите од пензионерскиот дом „Лика Чопова“, велат дека самите побарале да се санираат претходно нанесените штети на темелите на домот. Како управителот на домот се договорил со работниците, во чие име и на чиј трошок се санираат штетите, не добивме одговор
Иако првично почна да се гради на диво и не се знаеше кој е „инвеститор“, сега одобрение за градба на ова место од Општина Чаир бара „Аванти систем“ ДООЕЛ – Скопје. Општината под раководство на Висар Ганиу не дава дозвола и бара да се затрупа нелегалниот ископ
Неколкумина мајстори денеска се појавиле на градилиштето до пензионерскиот дом „Лика Чопова“ во Чаир, на кое, како што објавивме пред три месеци, се крева објект на диво. Присуството на работници на градилиштето го потврдува и фотографијата погоре.
Читатели на „360 степени“, кои живеат во непосредна близина на дивоградбата, велат дека во неколку наврати забележале работници на терен.
Ги контактиравме и најзасегнатите соседи – станарите на пензионерскиот дом и управителот. Оттаму ни кажаа дека на нивно барање градежни работници прават потпорен ѕид, откако со претходниот начин на работа се стигнало до темелите на домот поради што почнала да се рони земјата.
Под чија палка работат мајсторите и дали само се санира штетата направена на пензионерскиот дом или повторно се прави обид за да продолжи градењето на диво – не добивме одговор.
И во Општина Чаир ги имаат истите информации.
„Нашите информации говорат дека менаџментот на пензионерскиот дом се обратил до фирмата ‘Аванти систем’ ДООЕЛ, без да знаеме ние и без да се обрати во Општина Чаир, и од фирмата донеле работници за да се собере земјиштето што се лизнало до пензионерскиот дом“,
велат оттаму за „360 степени“.
„Аванти систем“ ДООЕЛ бара дозвола за градење
Обидот за кревање дивоградба на оваа локација е од минатата година. На местото порано имало барака, но очигледно е срушена со намера да се гради нешто друго.
Според Деталниот урбанистички план на Општина Чаир, за оваа локација има маркица за објект за индивидуално домување, oдносно приземје, плус два ката, плус поткровје. Но, до скоро никој не се обидел легално да стекне одобрение за градба.
Парцелата го носи бројот 4527 и е со површина од 667 квадратни метри. Од нив, 407 квадрати се земјиште под зграда, односно земјиштето под бараката која била на тоа место, а останатите 260 м2 се водат како градежно изградено земјиште. Целото земјиште е во сопственост на Република Северна Македонија, но има промени во сопственоста на објектот, односно некогашната барака.
Според документите од Катастарот, бараката е легализирана во 2014 година и до скоро гласеше на име на извесен Седат Адем. Објектот добил приватен сопственик преку легализација во 2014, а земјиштето под и околу него сѐ уште се води како државно.
Сега, најновите податоци од Катастар покажуваат дека нов сопственик на објектот со намена „стовариште за складирање стока на отворен/затворен простор“, со површина од 394 квадратни метри, е „Аванти систем“ ДООЕЛ – Скопје. Но, контурите на објектот кој почна да се крева на диво најавуваат градба со многу поголема основа од предвидената со Деталниот урбанистички план. Уште пред да се формализира купопродажниот договор, во октомври преку мејл ги прашавме „Аванти систем“ ДООЕЛ дали тие градат на диво и доколку да – зошто, но оттаму никогаш не добивме повратен одговор.
Градоначалникот на Општина Чаир, Висар Ганиу, во октомври минатата година се чудеше зошто не се бара одобрение за градење, кога на локацијата е предвидена можност за изградба на објект со приземје, два ката, плус поткровје.
„Можеби тенденцијата е да направат некој спрат повеќе, што од друга страна ја загрозува целата негова инвестиција бидејќи утре нема ниту еден документ да има ако тргнале на таа база“,
кажа Ганиу во интервју за „360 степени“ во октомври минатата година.
Сега, до Општината стигнало барање за одобрение за градење, токму од „Аванти систем“, но не добиле „зелено светло“.
„Од страна на ‘Аванти систем’ ДООЕЛ поднесено е барање за одобрение за градење на објект за домување во станбени куќи на КП 4527 КО Чаир. Од страна на Општина Чаир е разгледано барањето и е донесен заклучок за прекин на постапка поради недостатоци. Заради непостапување по забелешките од страна на Општина Чаир е донесено решение за одбивање на барањето“,
велат оттаму.
Од Општината со која раководи Висар Ганиу велат дека е издадено решение да се затрупа ископот.
„За катастарската парцела 4527 КО Чаир е донесено решение за отстранување на градбата (да го затрупа ископот), бидејќи е извршен широк машински ископ без одобрение за градба“,
велат од Општина Чаир.
ПОВЕЌЕ НА ТЕМА ДИВОГРАДБИ: