По нејзината инаугурација во Собранието, според најавата, во кабинетот на претседателот ќе се одржи официјална церемонија на примопредавање на функцијата претседател со највисоки државни и воени почести, по што е предвидена тет-а-тет средба со претседателот на државата во заминување Стево Пендаровски
Победничката на претседателските избори, професорката Гордана Силјановска-Давкова денеска точно напладне со свечена изјава во Собранието и официјално ќе биде инаугурирана како шестиот претседател на државата.
Со свечениот чин на положување заклетва започнува да тече нејзиниот петгодишен претседателски мандат во вилата „Водно“.
Силјановска-Давкова, која е првата жена претседател на државата, на функцијата ќе го наследи досегашниот претседател Стево Пендаровски, чиј мандат истекува денеска.
Инаугурацијата на новоизбраната претседателка ќе биде во рамките на 151. Седница на Собранието, на која давањето свечена заклетва ќе биде единствената точка на дневниот ред.
По свеченоста во Собранието, според најавата, во кабинетот на претседателот ќе се одржи официјална церемонија на примопредавање на функцијата претседател со највисоки државни и воени почести.
По церемонијата, новоизбраната претседателката Гордана Силјановска-Давкова и претседателот Стево Пендаровски, кој беше и нејзин противкандидат во трката за шеф на државата, ќе имаат тет-а-тет средба.
Денешните свечености доаѓаат откако вчера Државната изборна комисија на седница ги објави конечните резултати од гласањето во вториот круг на претседателските избори што се одржа на 8 мај.
Државната изборна комисија констатира дека за претседател е избрана професорката Гордана Силјановска-Давкова со мнозинство од гласовите, односно 561 000, додека нејзиниот опонент, професорот Стево Пендаровски освои 251 899 гласови. Записникот за конечност на резултатите од гласањето беше едногласно усвоен на седницата.
По седницата, претседателот на ДИК, Александар Даштевски, на Силјановска-Давкова ѝ го предаде уверението за избор на претседател на државата и во име на Комисијата ѝ посака успешен мандат.
Силјановска-Давкова во изјава за медиумите кажа дека овој чин секогаш претходи на прогласувањето и означува формална круна на изборите, притоа заблагодарувајќи се на сите чинители за организирањето на успешните избори.