И Калас и Кос сметаат дека слободните, фер и транспарентни избори, кои се во согласност со меѓународните стандарди, се предуслов за функционирање на демократските институции и се неопходни за Србија да ги исполни критериумите за членство во ЕУ
Во неделата, на 25 октомври, граѓаните на Србија излегоа на гласање во рекорден број за да се слушне нивниот глас. Гласачите ѝ дадоа силен мандат за промени на идната влада. Очекуваме тоа да се реализира и во практика, се вели во заедничката изјава на високата претставничка на ЕУ за надворешни работи и безбедносна политика Каја Калас и еврокомесарката за проширување Марта Кос објавена денеска
„Брзото признавање на изборните резултати од страна на главните учесници на изборите покажува посветеност кон непречен демократски процес. Официјалната потврда на изборните резултати треба да овозможи уредна транзиција, како и формирање на парламентот и владата без одлагање, со цел да се започне со решавање на клучните предизвици со кои се соочува Србија“,
се вели во изјавата.
И Калас и Кос сметаат дека слободните, фер и транспарентни избори, кои се во согласност со меѓународните стандарди, се предуслов за функционирање на демократските институции и се неопходни за Србија да ги исполни критериумите за членство во ЕУ.
Во тој контекст, се додава во изјавата, ЕУ ги зема предвид прелиминарните наоди и заклучоци на Меѓународната мисија за набљудување на изборите (IEOM), составена од претставници на Канцеларијата на ОБСЕ за демократски институции и човекови права (ОДИХР), Европскиот парламент (ЕП), Парламентарното собрание на Советот на Европа (ПССЕ) и Парламентарното собрание на ОБСЕ (ПС на ОБСЕ).
Според нив, во своите прелиминарни наоди, Меѓународната мисија за набљудување на изборите (IEOM) констатирала генерално ефикасно управување со изборните подготовки, како и позитивна оцена за сите фази од процесот на денот на изборите во огромното мнозинство избирачки места.
„Мисијата истакна дека изборниот амбиент бил нарушен од вкоренетите предности што ги ужива владејачката партија – вклучително и злоупотреба на државните ресурси, изразена пристрасност во медиумското известување во корист на владејачката партија, заплашување и притисок врз гласачите, кандидатите и граѓанското општество, како и попречување на кампањските активности. Пријавените инциденти на физичко насилство предизвикаа сериозна загриженост“,
се додава во заедничката изјава.
Тие велат дека приоритет останува суштинското подобрување и реформирање на изборната рамка – преку инклузивен процес во кој ќе учествуваат сите релевантни чинители, со цел да се обезбеди искрена и целосна имплементација на препораките на ОБСЕ/ОДИХР и на Советот на Европа.
„ЕУ останува подготвена за тесна соработка со новата српска влада во однос на основите на процесот на пристапување кон ЕУ, особено во поглед на демократските критериуми, независното правосудство и основните права, вклучително и слободата на медиумите. Гледајќи напред, намалувањето на поларизацијата во општеството е од суштинско значење за градење доверба меѓу граѓаните и за надминување на поделбите. ЕУ е подготвена да понуди поддршка за реформите и да ги претвори истите во можности за народот на Србија“,
додаваат европските дипломатки во заедничката изјава.