Терапијата за болничарката од Инфективната клиника на која пред неколку дена ѝ беше дијагностицирана болеста конго-кримска хеморагична треска е започната денеска, и истата ќе ѝ се дава во наредните четири дена
Директорката на Инфективната клиника, Милена Стевановиќ, на прес-конференција информира дека за жал првата пациентка од Штипскиот Регион која почина од оваа болест добила дијагноза и починала неколку часа откако стигнал позитивниот резултат, па затоа, дури и доколку надлежните го имале лекот на залиха, за неа немало спас. Таа дополнително изјави дека веднаш стапиле во контакт со инфектолози од регионот од кои побарале искуства и лекови.
„Ниту една држава нема ваков тип на лек во залиха. Ниту една. Лекарите, организациите кои работат во решавањето на овие големи или помали епидемии на конго-кримска и други хеморагични трески во ендемските подрачја ги имаат и на ваков начин помагаат кога ќе се јават спорадични случаи како што е нашиот”,
изјави директорката Стевановиќ.
Кога станува збор за вториот случај, односно болничарката од Клиниката за инфективни болести – нејзината состојба засега е стабилна, но таа влегува во фаза во која се очекува појава на крвавење, т.н. хеморагична фаза. Кај неа ноќеска било забележано крвавење и затоа е одлучено уште од денес да започне да прима терапија со лекот рибавирин, со што Стевановиќ вели дека сметаат оти се на добар пат и навремено се преземаат сите чекори во лечењето на пациентката.
„Рибавиринот е антивирусен лек и целта е да се спречи размножувањето на вирусот, да се намали неговата моќ, наједноставно кажано. Овој лек ние порано сме го имале, и сме лекувале хроничен хепатит Ц како составен дел на терапијата со интеферони. Го немаме повеќе затоа што третманот на хепатит Ц веќе одамна е комплетно променет и таквиот третман е исклучен од употреба,
кажа Стевановиќ.
За потсетување, вработена на Клиниката за инфективни болести и фебрилни состојби (КИБФС) пројавила симптоми на конго-кримска хеморагична треска откако инфекцијата беше детектирана кај 27-годишна жена од Штип, која набргу и почина. Заразената пациентка пројавила симптоми на деветтиот ден од надзорот и е идентификувана како контакт со среден ризик.
Откако болничарката добила позитивен резултат на испитувањата за конго-кримска хеморагична треска, екипа епидемиолози од Центарот за јавно здравје извршиле епидемиолошки увид и анкети на контакти, по што биле издадени 11 решенија за исто толку лица кои ќе бидат под 14-дневен здравствен надзор. Овој надзор не подразбира класична изолација, туку овие лица ќе треба да се јавуваат и да бидат во постојан контакт со епидемиолозите, но воедно треба да избегнуваат контакт со други лица.
Претседателот на Комисијата за заразни болести, Злате Мехмедовиќ, пред неколку дена информираше дека Институтот за јавно здравје веќе дал препораки во однос на тоа што треба да се направи за да се превенира болеста. Според него, од информациите со кои располагаат, првиот случај, односно починатата жена се заразила со директен контакт со крлеж, додека, пак, вториот случај со здравствениот работник најверојатно е преку пренос на контаминирана крв.
Тој рече дека не очекуваат да има повеќе случаи на заразени со конго-кримска хеморагична треска.