Опозицијата ја обвинува власта затоа што, според неа, не било реагирано навремено, не биле сервисирани авионите и немало хеликоптери на терен
Опозициската ВМРО-ДПМНЕ најавува дека ќе поднесат кривични пријави до претставници од власта затоа што не постапиле навремено во спречување на пожарот кај Кочани. Портпаролот на партијата, Димче Арсовски вели дека правниот тим на партијата ги разгледуваат сите опции во која насока и за кого би биле пријавите, а на конкретно прашање против кого, тој ги напомена премиерот Зоран Заев и директорот на Центарот за управување со кризи, Стојанче Ангелов.
„Видете, еве барам одговорност денеска тука со оваа прес-конференција, но како што реков правните тимови разгледуваат и за луѓе коишто раководат со институциите, тука би ги напоменал Зоран Заев, Стојанче Ангелов и сите останати луѓе коишто треба да раководат со тој кризен штаб којшто за жал не функционира. Но, еве уште од овој момент апелирам за оставки на Стојанче Ангелов и сите останати вклучително и Зоран Заев за нивното непостапување односно за нивната нефункционалност како институција“,
рече Арсовски на прес-конференција во Кочани.
Тој вели дека одговорноста ја бараат затоа што не биле сервисирани авионите и затоа што на терен синоќа немало хеликоптери.
„Наместо да се сервисираат оние авиони, ЕР трактори односно канабери коишто со сервисот чинат само 400 000 евра, власта и Заев и сите останати не најдоа време, не најдоа пари, иако ја задолжија Македонија и ги потрошија за само една година една ипол милијарда евра. Не најдоа ниту време, ниту пари да ги сервисираат за да не ни се случи ова коешто ни се случи вчера … Бараме одговорност за тоа што немаше хеликоптери вчера да го гасат пожарот. Не летале нашите хеликоптери ноќе, срамота, а 21 век е, држава Република Македонија, власт. Немало хеликоптери за граѓаните да им се помогне, а имаше хеликоптери кога требаше да се возат Венко Филипче и Зоран Заев на нивни приватни забави и настани“,
обвини Арсовски.