Штетата предизвикана од пожарите е материјална и таа ќе биде надоместена, сега е најважно дека немаме ниту повредени, ниту жртви, вели директорот на Центарот за управување со кризи, Стојанче Ангелов.
Тој денеска информираше дека се активни шест пожари на територијата на целата земја, од кои повеќето се под контрола, а најкритично е во Кочани и Старо Нагоричане.
Ангелов појасни дека пожарот во Кочани, чии пламени јазици вчера стигнаа речиси до градот, бил предизвикан најверојатно од спој на жици. Тој појасни дека не станува збор за стариот пожар од пред неколку дена бидејќи, како што рече, тој пожар бил на друг дел од градот и бил целосно изгаснат.
„Најверојатно, причината е спој на жици од бандери. И не станува збор за стариот пожар како што се појавија шпекулации, туку за сосема нов. Сувата вегетација придонела пожарот да се рашири во неколку различни правци. Кога ситуацијата стана сериозна, од страна на градоначалникот, од мене беше побаран хеликоптер. Но, во тој момент тој дејствуваше во Старо Нагоричане и не можевме да го упатиме кон Кочани поради тоа што немаше доволно гориво. За да дојде во Кочани требаше да се врати назад и да наточи, но во тој случај немаше да стигне. Пожарот во Кочани со сите капацитети го контролиравме од земја“,
рече Ангелов.
Во текот на денешниот ден во гаснењето на пожарите се вклучени два армиски хеликоптера, но како што рече Ангелов, тие мора да прават пауза, бидејќи не смеат да летаат на температури над 37 целзиусови степени.
„На температури над 37 степени не е безбедно да се летаат хеликоптери. Дали треба да ги загрозуваме и нашите пилоти? Не може да летаат на овие пеколни температури. Зарем треба да падне хеликоптер за некој да сфати дека не може да летаат и тие се ограничен ресурс“,
рече Ангелов.
Тој информираше дека хеликоптери ќе пристигнат попладнево и од Србија, а помош ќе биде испратена и од Грција.
На утринската седница на групата за проценка составена од директорите на разузнавачките, контраразузнавачките служби, директорот на Бирото за јавна безбедност, како и директорите и заменик-директорите на Центарот за управување со кризи (ЦУК) и на Дирекцијата за заштита и спасување (ДЗС), едногласно се одлучило дека нема потреба од прогласување кризна состојба во државата поради пожарите.
„По опсежна расправа, по разгледување на актуелната состојба со пожарите, едногласно одлучивме дека нема потреба од прогласување кризна состојба, но ќе бидеме во постојано заседание и доколку работата тргне на полошо, набрзина ќе одржиме седница на која ќе побараме да биде прогласена кризна состојба на дел од територијата на државата, онаму каде што е зафатена со пожар“,
рече Ангелов.
Оваа одлука ја донеле поради неколку причини – прво бидејќи претседателот Стево Пендарвски во текот на вчерашниот ден даде наредба за употреба на Армијата и тоа на копнените сили не само на воздухопловниот ВИНГ, така што благодарение на одредени законски и подзаконски акти и во овој момент можеме да ги користиме сите расположливи ресурси на Армијата. Воедно, додаде Ангелов, и каналите за добивање меѓународна помош се отворени и добро функционираат и без прогласена кризна состојба.