Зеленски: Убеден сум дека ракетата што падна во Полска не е украинска

Зборувајќи пред новинарите, претседателот Зеленски рече дека добил извештаи од командата на вооружените сили и воздухопловните сили на Украина и „не може, а да не им верува“

Украинскиот претседател, Володимир Зеленски денеска изјави оти е убеден дека проектилот што падна и експлодираше во Полска и уби две лица вчера вечер не бил украински.

Зборувајќи пред новинарите, претседателот Зеленски рече дека добил извештаи од командата на вооружените сили и воздухопловните сили на Украина и „не може, а да не им верува“.

„Не се сомневам дека тоа не беше наша ракета“,

ја пренесува новинската агенција Интерфакс изјавата на Зеленски.

Тој додал дека верува оти на Украина би требало да и биде дозволен пристап до местото на експлозијата во источна Полска.

„Зарем не можеме да ги изнесеме конечните заклучоци? Дали имаме право да бидеме во истражниот тим? Секако“,

рекол Зеленски.

Изјвата на Зеленски доаѓа откако, Полска и НАТО рекоа дека инцидентот најверојатно бил предизвикан од ракета на украинската протввоздушна одбрана, иако полскиот премиер Матеуш Моравјецки рече дека е можно инцидентот да е резултат на провокација од руска страна.

Моравјецки: Не можеме да исклучиме дека гранатирањето на украинската инфраструктура во близина на границата е намерна провокација

Анджеј Дуда, полскиот претседател, рече дека има „многу индикации“ дека ракетата –  „најверојатно“ од типот  С-300 од руско производство – била истрелана како дел од воздушната одбрана на Украина и „за жал паднала на полска територија“.

Генералниот секретар на НАТО, Јенс Столтенберг, ја потврди првичната анализа дека инцидентот „најверојатно бил предизвикан од украинска ракета за противвоздушна одбрана истрелана за одбрана на украинска територија“ против нападите со руски крстосувачки ракети.

Столтенберг: Падот на ракетата не беше намерен напад, немаме индиции дека Русија подготвува воени акции против НАТО