Со привремената забрана е опфатена и фирма на еден од осомничените во случајот со Рашковски, каде што државата има отштетно побарување од околу 290 илјади евра
Исто така, за нови 30 дена се продолжени претходно изречените мерки за обезбедување на осомничените. Според тоа, Рашковски и во наредните 30 дена останува во домашен притвор
Обвинителството донесе одлука за замрзнување на имотот на поранешниот генерален секретар на Владата, Драги Рашковски, кој е моментно во куќен притвор како еден од осомничените во истрагата за злоупотреба на службената положба при јавни набавки. Станува збор за забрана ексгенералниот секретар да располага со парите кои се наоѓаат на сметка за која тој има овластување, како и замрзнување на имотот што е на име на двете малолетни деца на Рашковски. Со привремените мерки за обезбедување на имотно-правно барање е опфатена и фирма на третоосомничениот во случајот.
Од обвинителството велат дека побарале мерки за привремено обезбедување на имотот за да не дојде до „осуетување на намирувањето на отштетното побарување во текот на постапката“. Како оштетена странка, додаваат, се јавува државата, а вкупното отштетно побарување е 17 642 237 денари (околу 290 илјади евра).
„Уважувајќи го барањето, судијата на претходна постапка при Основниот кривичен суд – Скопје донесе Решение за привремена мерка со кое спрема едно од осомничените лица е определена привремена мерка – забрана за располагање со средства од сметка на која осомничениот како физичко лице има овластување да располага. Со истото Решение спрема две малолетни лица, на кои првоосомничениот во предметот е законски застапник, е определена привремена мерка – Забрана за отуѓување или оптоварување на своите недвижности или стварни права кои врз недвижноста се запишани во корист на законскиот застапник, со прибелешка на таа забрана во јавна книга или да ги даде под закуп. Воедно, спрема едно правно лице во сопственост на трет осомничен судијата на претходна постапка определи привремена мерка – Забрана за отуѓување или оптоварување на движни ствари“,
соопштија од Обвинителството.
Мерките за замрзнување на имотот, додаваат, ќе траат најдолго до правосилно завршување на кривичната постапка или до поинаква одлука на судот.
Исто така, како што соопштија од Обвинителството, продолжени се за нови 30 дена претходно изречените мерки за обезбедување на осомничените. Според тоа, Рашковски и во наредните 30 дена останува во домашен притвор.
Зошто се гони Рашковски?
Драги Рашковски беше генерален секретар на Владата од 2017 до 2020 година. Во актуелната влада, на таа позиција го наследи Мухамед Зеќири, а Рашковски доби позиција во премиерскиот кабинет која досега не беше позната за јавноста – секретар во кабинетот.
На почетокот на март годинава, „360 степени“ објави сторија дека Драги Рашковски како генерален секретар купил софтвер за автоматско казнување на сообраќајни прекршоци кој ниту некој му го барал ниту, пак, некој го користи. Министерството за внатрешни работи, кое единствено може да казнува во сообраќајот, беше децидно дека не побарале такво нешто од Рашковски ниту имаат намера да го користат тоа што го купил.
Дополнителните новинарски истражувања на „360 степени“ покажаа дека софтверот купен за околу 81 000 евра, всушност, во многу наликува на патент кој Драги Рашковски како иноватор го регистрирал во Државниот завод за индустриска сопственост. Понатаму, откривме и дека софтверот бил платен непосредно пред изборите на 15 јули уште пред да биде тестиран, иако според тендерската документација требало да биде обратно – прво успешен тест, па потоа плаќање.
На новинарските истражувања реагираше Обвинителството за гонење организиран криминал и корупција, кое отвори предистражна постапка на 18 март. По еден месец предистрага, на 16 април Рашковски беше задржан, а против него Обвинителството отвори истражна постапка. Обвинителството бараше затворски притвор, но првично Рашковски доби куќен притвор од Кривичниот суд во Скопје. Дури во втор степен беше одобрено барањето на ОЈО за гонење на организиран криминал Рашковски да се брани од Шутка, поради опасност од влијание врз сведоци.
По речиси еден месец поминати во притвор, Обвинителството кое го води Вилма Русковска отвори уште една истрага против Драги Рашковски. Во своето соопштение до јавноста тие кажаа дека станува збор за уште еден тендер додека бил генерален секретар, но не понудија многу детали. По „трошките“ од соопштението, „360 степени“ откри дека станува збор за јавна набавка на „систем за биометриска идентификација“ со државни пари во 2019 година. Како и во првиот случај, овој систем никој не го барал од Рашковски, никој не го користи ниту, пак, знае каде е. И повторно, тоа што Рашковски го купил како генерален секретар во 2019 година веќе го имал патентирано како изум, овој пат во 2013 година.
Обвинителството сепак не застана таму, туку го осомничи Рашковски и за друга злоупотреба – дека му плаќал месечна сума од 80 000 денари барем на еден хонорарец, кој потоа бил задолжен да му враќа дел од таа сума.