Одбивањето да го потпише указот на Законот беше повод за неколкудневна преписка меѓу шефот на државата и Демократската унија за интеграција која, меѓу другото, го обвини Пендаровски за двојни стандарди. Сега законот е повторно во Собранието и, како што може да се види на календарот на официјалната веб-страница на законодавниот дом, тој е прва точка на дневен ред на 145. пленарна седница закажана за 28 февруари
Претседателот на државата Стево Пендаровски направи голема грешка што не го потпиша Законот за игри на среќа и забавните игри, вели потпретседателот на ДУИ и координатор на пратеничката група на оваа партија во Собранието, Арбер Адеми, кој очекува Законот да биде усвоен во трето читање на пленарната собраниска седница закажана на 28 февруари.
Пендаровски реши да го искористи уставното право на суспензивно вето и да не го потпише Законот, кој беше усвоен на 7 февруари по скратена постапка, односно со „европско знаменце“. Токму „европското знаменце“ прикачено на текстот на Законот беше главна причина поради која шефот на државата не го потпиша указот за негово прогласување, а како што наведе во известувањето до претседателот на Собранието Јован Митрески, забелешки за несоодветна употреба на знаменцето имало и од Делегацијата на Европската Унија во земјава.
Одбивањето да го потпише указот на Законот беше повод за неколкудневна преписка меѓу шефот на државата и Демократската Унија за интеграција која, меѓу другото, го обвини Пендаровски за двојни стандарди.
Сега Законот е повторно во Собранието и, како што може да се види на календарот на официјалната веб-страница на законодавниот дом, тој е прва точка на дневен ред на 145. пленарна седница закажана за 28 февруари.
Бидејќи шефот на државата одби да го потпише првиот пат кога беше донесен, а главната забелешка беше во однос на процедурата, сега за Законот ќе се одлучува во редовна постапка.
„На 28 (февруари) е предвидена седница во Собрание, тоа е следна недела каде точка на дневен ред е токму овој закон и очекувам дека пратениците ќе бидат на страна на граѓаните, како и на страната на Движењето антикоцкање. Доста е со казина и обложувалници во секое ќоше насекаде, речиси и во дворовите на училиштата. Јас само едно можам да ви кажам дека според правната рамка најдоцна во рок од 30 дена Собранието пак треба да се изјасни за Предлог-законот. Веќе добиваме поддршка од сите пратеници и со апсолутно мнозинство, со 61 глас очекувам дека на трето читање ќе биде усвоен овој закон и така ќе го штитиме интересот на граѓаните“,
изјави денеска Адеми.
Коментирајќи ја одлуката на албанскиот парламент да ја укине четиригодишната забрана во делот на обложувањето по допис од Европската комисија поради масовна појава на коцкање на црно, Адеми рече дека таму се целосно затворени објектите за игрите на среќа и посочи дека законот во нашата земја не го предвидува тоа.
„Таму целосно се затворени и во Албанија и во Косово. Нашиот предлог не вели така. Нашиот предлог ако го читате вели дистанца од 500 метри, иако нашето барање беше илјада метри. Тој предлог беше доставен во редовна постапка во Комисијата за финансирање и буџет речиси пред три години. За две години кадарот на ВМРО-ДПМНЕ кој ја води Комисијата за финансирање и буџет не свикал седница за пратениците да може да го изразат нивниот став, а на крај со слободна волја и да гласаат“,
рече Адеми.
Тој обвини дека донесувањето на Законот се блокира и опструира само за да се заштити интересот на мафијата, на казината и на обложувачниците.
„Кој е против донесувањето на овој закон? Кој протестира надвор? Кој протестира пред Собранието? Казината и обложувачниците. Кој е за овој закон – ДУИ и сите тие пратеници 55 кои гласаа на второ читање за донесување на овој закон“,
рече пратеникот од редовите на ДУИ.
На новинарско прашање какви се односите на ДУИ со претседателот на државата откако одби да го потпише указот за прогласување на Законот, Адеми рече оти имаат добра соработка и комуникација со него.
„Ние имаме добра комуникација и соработка со г. Пендаровски. Како што истакна вчера и претседателот Ахмети, му посакуваме добро здравје и успех, а во врска со непотпишување на законот за кој гласаше мнозинство на пратениците во Собранието најдобриот одговор го доби од самите граѓани. Сега се поставува прашањето на која страна сме ние, чиј интерес штитиме – на граѓаните, на движењето антикоцкање или сме на страната на казината, на обложувалниците кои веќе се отворени секаде“,
повтори Адеми.
Според членот 75 од Уставот, во кој е санкционирано правото на шефот на државата на суспензивно вето, доколку тој одлучи да не го потпише указот, Собранието повторно го разгледува законот и доколку тој биде усвоен со апсолутно мнозинство, односно ако за него гласаат мнозинство од вкупниот број пратеници – најмалку 61 – шефот на државата е должен да го потпише указот.