Премиерот Зоран Заев најави дека Владата ќе продолжи со дискусија во однос на Законот за легализација на бесправно изградени објекти имајќи ги предвид, како што вели, предлозите на претседателот Стево Пендаровски, односно укажувањата за неговите резерви што тој ги има како причина за непотпишување на указот. Според Заев, има подготвеност да се дополни Законот.
„Мислам дека преку стручните тимови во Владата можеме и да одиме чекор понатаму во прецизирање на легализирање во национални подрачја, национални паркови, заштитени подрачја и слично, иако законите го определуваа тоа и досега. Се знае кој дава согласност, како се дава согласност и немаме легализација во националните паркови“,
изјави Заев.
Заев го повтори ставот дека треба да се земе предвид социјалниот аспект и дека отсуството на закон за легализација на дивоградбите ќе значи уривање на 50 илјади домови.
„Едната опција е да не продолжиме понатаму со законот и тоа автоматски значи отстранување на сите бесправни градби во државата. Затоа што законите се јасни, и инспекторот е должен да издаде решение за уривање и доколку тоа не го направи одговара кривично. А градоначалникот или министерот за транспорт и врски ако не направи извршување, односно не го урне објектот одговара кривично. Тоа значи дека сите институции од локално и централно ниво ќе мора да ја завршат таа обврска, во спротивно ризикуваат кривични пријави и процеси пред обвинителства и пред судство“,
додаде Заев.
Претходно, претседателот Пендаровски одби да го потпише указот на Законот за легализација на дивоградби и го врати во Собранието со образложение дека е неуставен и спротивен на владеењето на правото, како и дека со одредени членови се предвидува скриена амнестија за сопствениците на објекти што граделе „на диво“.