Лидерот на ВМРО-ДПМНЕ, Христијан Мицкоски, им посака среќа на СДСМ и Беса на изборите и рече дека се мали шансите и тој да формира предизборна коалиција со партија на Албанците
Беса, која на изборите во 2016 година освои пет пратенички места и близу 58 илјади гласа, одби да партиципира во владата што во првата половина на 2017 година ја формираа Заев и Ахмети
Досега владејачкиот СДСМ и опозициската Беса ќе настапат заедно на десеттите парламентарни избори во земјава, согласно договорот што денеска го потпишаа партиските лидери Зоран Заев и Билал Касами, така што нивни главни противници во изборниот ринг ќе бидат ВМРО-ДПМНЕ и ДУИ.
За разлика од владејачката ДУИ, која се определи за самостоен изборен настап, лидерот на ВМРО-ДПМНЕ, Христијан Мицкоски, денеска најави проширување на опозициската коалиција, но не по „теркот“ на социјалдемократите, туку со други партии од т.н. македонски политички блок.
Мицкоски не планира „мешана коалиција“
Мицкоски им посака среќа на Заев и на Касами на изборите и рече дека се мали шансите ВМРО-ДПМНЕ да формира предизборна коалиција со партија на Албанците.
„Моментно, мали се шансите за такво нешто пред изборите. Да почекаме да се случи најголемата победа во независна Македонија – на коалицијата на ВМРО-ДПМНЕ „Обнова на Македонија“ со народот. Потоа, ако на политичка и програмска основа имаме потреба од какво било коалицирање, со кој било политички субјект, тука сме, подготвени сме да разговараме и да создадеме коалиција“,
рече Мицкоски.
Тој рече дека во коалицијата „Обнова на Македонија“ остануваат политичките партии што беа дел од неа, како и дека преговараат со други политички партии што се заинтересирани да бидат дел од коалицијата.
„Нашите позиции се јасни, принципиелни и од тие позиции отстапување нема. Го слушнавме ставот, барањата од различни политички субјекти што преговараат со нас и ние ги презентиравме нашите позиции. Следната недела ќе излеземе со повеќе детали“,
изјави Мицкоски
Наспроти умерената реакција на Мицкоски, подоцна дојде реакција од прес-центарот на ВМРО-ДПМНЕ во која се оценува дека коалицијата меѓу СДСМ и Беса е коалиција за продолжување на криминалното владеење.
„Беса е партијата која заговараше федерализација на Македонија, а добро е да се знае дали и Заев ги дели истите ставови. СДСМ креира поделби. Лидерот на Беса за лидерот на СДСМ кажа дека тој е измамник кој не си стои на зборот. Два месеца потоа, коалицира со истиот тој измамник“,
се наведува во соопштението на ВМРО-ДПМНЕ.
Заев со порака до досегашните партнери од ДУИ
Претходно, Заев ја нарече историска коалицијата со Касами, посочувајќи дека граѓанскиот концепт ги надминува стереотипите, така што времето на поделби е завршено.
„Моноетничкиот концепт, кога партиите му се обраќаа само на својот етнички кампус е надживеан. Во семејството на полноправни членки на НАТО и на ЕУ не се влегува со декларативни заложби за единство, туку со дела и визија за сигурна иднина. На изборите во 2016 година СДСМ беше првата македонска партија која со своите принципи и определби привлече десетици илјади албански гласови. Но, ова денес е посебен чин, нов историски момент за демократијата и за плурализмот“,
рече Заев.
Најголемо внимание предизвика неговата порака дека коалицијата на СДСМ е победничка и дека по изборите нема да дозволи никој да го уценува, нагласувајќи дека тоа се однесува на партиите од албанскиот блок.
„Владеењето на правото, човековите слободи и права, економскиот прогрес, солидарноста и толеранцијата…, се столбовите на кои почива модерната македонска држава, а на кои ќе се потпира и оваа коалиција, вклучително со договорите со Грција и со Бугарија. Со сите што цврсто стојат на овие принципи, има простор за разговор. Се разбира, тоа не е и не може да биде ВМРО-ДПМНЕ, додека на чело на партија се Мицкоски и Груевски. Што се однесува до другите албански партии и коалиции, сакам да ја уверам јавноста дека како победничка коалиција нема да дозволиме да бидеме уценувани и нема да прифаќаме непринципиелни преговарања и договарања“,
нагласи Заев.
Подоцна, запрашан дали оваа порака е упатена до досегашниот коалициски партнер во Владата – ДУИ, Заев истакна дека од партијата на Али Ахмети зависи како ќе се позиционира во однос на СДСМ. Нивна работа е, рече Заев, дали ќе се менуваат на подобро.
„Одлуката на ДУИ по изборите во 2016 година за коалицирање со СДСМ помогна да падне ‘режимот’. Имавме заеднички успеси. Донесовме многу важни одлуки. Но имавме и проблеми. Технички ние сме заедно и функционираме до завршувањето на мандатот на оваа влада. Дури и заедно настапивме на локалните избори во 2017 година. Но ја користам оваа можност да порачам дека како партии треба да се менуваме на подобро, да работиме заеднички за доброто и за иднината на нашата земја“,
рече Заев.
Партнери и ривали
Потоа и Касами, на новинарско прашање дали по изборите би прифатиле ДУИ да биде дел од владината коалиција, изјави дека тоа ќе биде можно за сите политички партии кои би ги прифатиле вредностите на коалицијата на СДСМ и Беса, без никакви услови и уценувања.
„Беса е создадена како партија врз основа на потребите на граѓаните на Северна Македонија, посебно граѓаните Албанци. Движењето Беса се појави како одговор на револтот на граѓаните од политиките на ДУИ. И ние ќе продолжиме уште долго по заминувањето на ДУИ во историјата“,
рече Касами.
Тој, всушност, коментираше изјава на вицепремиерот за европски прашања Бујар Османи, кој, како што пренесуваат дел од медиумите, рекол дека претопувањето на Беса во сојуз со СДСМ е на штета на Албанците.
Беса, која на изборите во 2016 година освои пет пратенички места и близу 58 илјади гласа, одби да партиципира во Владата што во првата половина на 2017 година ја формираа Зоран Заев и Али Ахмети, а во која како партнер влезе и Алијансата за Албанците. По локалните избори во 2017 година и заедничкиот настап на СДСМ и ДУИ, Алијансата се повлече од Владата. Зајакнувањето на парламентарното мнозинство подоцна го овозможија ДПА, која има двајца пратеници во неодамна распуштениот собраниски состав и новоформираната Алтернатива на Африм Гаши, кон која се приклучија тројца од вкупно петтемина пратеници што беа избрани од листата на Беса. Алтернатива, минатата недела, влезе во коалиција со Алијансата за Албанците. ДПА, пак, најави можен заеднички настап со НДП на Весел Мемеди, кој „во последен момент“ ја напушти владејачката коалиција на СДСМ и замина од претседателската функција во парламентот, откако при последната владина реконструкција остана без министерското место во локална самоуправа, кое му припадна на ЛДП.