Додека Мицкоски тврди дека преговара со „многу партии“ за заеднички изборен настап, само три од вкупно 21 партија од собранискиот состав што се распушти неодамна и натаму фигурираат како партнери на ВМРО-ДПМНЕ
Лидерот на ВМРО-ДПМНЕ, Христијан Мицкоски, и денеска изјави дека многу скоро јавноста ќе го дознае составот на коалицијата со која ВМРО-ДПМНЕ ќе излезе на априлските избори. Настапувајќи со речиси идентичен одговор како и вчера, Мицкоски им забележа на новинарите дека секој ден му поставуваат прашања во врска со коалицирањето.
„Секој ден ме прашувате за коалицирањето. Не би сакал да зборувам со кого конкретно сме во преговори и разговори. Кога ќе има промена на дневна основа, ќе ја известиме јавноста. За нас е најважно тоа што на 12 април, несомнено и недвојбено, ќе се случи најголемата историска победничка коалиција од осамостојувањето на Македонија, а тоа е победата на коалицијата „Обнова на Македонија“,
изјави Мицкоски.
Трансфери
Додека опозицискиот лидер тврди дека преговара со „многу партии“ за заеднички изборен настап, само три од вкупно 21 партија од собранискиот состав што се распушти неодамна (без да се смета независната пратеничка група) и натаму фигурираат како партнери на ВМРО-ДПМНЕ. Ако од вкупната бројка од 21 партија се „одземат“ СДСМ, ВМРО-ДПМНЕ и партиите од албанскиот блок, излегува дека од 14 помали партии дури 11 се поблиску од сојузништво со СДСМ отколку со главната опозициска партија.
Во коалиција со ВМРО-ДПМНЕ до крај останаа единствениот пратеник од Демократската партија на Србите, Иван Стоиљковиќ и двајцата пратеници на Социјалистичката партија – Љупчо Димовски и Стојан Миланов (додека Владанка Авировиќ премина во независната пратеничка група). За коалициски партнер на ВМРО-ДПМНЕ се смета и ГРОМ, иако, од двајцата пратеници што влегоа во парламентот како кандидати од партијата на Стевчо Јакимовски, едниот – Чедомир Саздовски се врати во СДСМ, додека Панчо Минов излезе од пратеничката група на главната опозициска партија, по што гласаше за прогласувањето на уставните измени од Преспанскиот договор, а неодамна и за Законот за јавно обвинителство.
Од другите парламентарни партии, ЛДП и НСДП и неколку партии на помалите етнички заедници повеќе години се во коалицијата со СДСМ, уште од опозицискиот период. Од претходните избори во 2016 година во коалиција со СДСМ е и ДОМ, а во изминатите три години кон владејачкото мнозинство се приклучија и пратениците на Демократската партија на Турците и на Сојузот на Ромите…
Преговори
Мицкоски изјави денеска дека по изборите може да разговара со сите политички партии за формирање на идната владина коалиција. За разлика од лидерот на СДСМ, Зоран Заев, кој отворено зборува дека планира да формира мултиетничка коалиција со вклучување на партии од албанскиот политички блок, Мицкоски засега не открива со кои политички субјекти би ја проширувал коалицијата.
Мицкоски денеска им посака на СДСМ и на Беса да се договорат и да излезат заедно на изборите. Посочи дека имал средби со сите политички лидер, вклучително со Билал Касами од Беса.
„Логично е што сме разговарале со Касами. Сме разговарале во тој момент за она што не чини во државата. Гледам дека сега разговараат со СДСМ, претпоставувам за тоа дека блескаме. Им посакувам конечно да се договорат и да имаат среќа и успеси на изборите. За нас е најважно да имаме фер и демократски избори на 12 април, иако сега индициите се најмалку во насока на тоа дека изборите ќе бидат фер и демократски“,
потенцира лидерот на ВМРО-ДПМНЕ.
Драгиша Милетиќ и Амди Бајрам се одделуваат од СДСМ?
Заев изјави неодамна дека останува сегашната коалиција на партијата, но и дека се водат разговори за приклучување на други политички партии. Извори од СДСМ, сепак, не исклучуваат можност, во идната колаиција предводена од владејачката партија да не учествуваат партиите на Драгиша Милетиќ и на Амди Бајрам. Оваа најава е во контекст на изјавата на Мицкоски од пред извесно време дека разговара за коалиција и со партии кои сега се партнери на СДСМ.
Додека течат роковите за доставување на кандидатските листи за пратеници во ДИК, најдоцна до 12 март на полноќ, единствена извесна коалиција засега е таа меѓу Алтернатива на Африм Гаши и Алијансата за Албанците на Зијадин Села. Владејачката ДУИ, најверојатно, ќе оди сама на изборите.
Голема е веројатноста за самостоен изборен настап и на ДПА. Лидерот на оваа партија, Мендух Тачи, изјави пред извесно време дека Мицкоски му испратил понуда за соработка преку сериозен посредник од една странска држава. Тачи, исто така, посочи дека веќе не ја препознава ВМРО-ДПМНЕ како партија ориентирана кон ЕУ, како во времето кога беше стратегиски партнер на ДПА. Тачи деновиве се споменуваше и како можен партнер во коалицијата на СДСМ за овие избори, но викендов тој најави можен самостоен настап.