Претседателката на Европската комисија Урсула фон дер Лaјен на турнејата низ Западен Балкан денеска престојува во Приштина, од каде што порача дека се работи на решенија кои се применливи во контекст на дијалогот меѓу Белград и Приштина. Таа изрази уверување дека проблемот со регистарските таблички ќе се реши без криза
Амбасадата на САД во Косово вчера повика одлуката на косовската влада за пререгистрација на автомобилите да се спроведе мирно и да не се придонесува за раст на тензиите
Александар Вучиќ, претседателот на Србија, по седницата на Советот за национална безбедност изјави дека земјите од таканаречената Квинта се согласиле со ставот дека акцијата на Косово за пререгистрација на регистарските таблички е легитимна, но дека проблемот е во времето и методите. Тој, исто така, рече дека Србија нема да дозволи прогон или убивање на својот народ, алудирајќи на Србите во Косово, притоа ветувајќи дека нема да има предавање.
Вучиќ на почетокот рече дека слушал сè што му кажале претставниците на Србите од Косово на средбата утринава. Досега 17 лица ги пререгистрирале возилата.
„Ваков меѓународен акт не постои, но кому му е грижа. Пред неколку дена го добивме демаршот, договорените позиции на земјите од Квинта и земјите од Европската Унија. Втората точка вели дека треба да разбереме дека постапката на Косово во однос на табличките е легитимна и дека проблемот е во времето и методите. Ги известив и амбасадорите на Квинта и им кажав дека тоа се ноторни лаги и дека никаде не пишува затоа што го прочитав секој труд и го знам секој параграф“,
рече Вучиќ.
Тој објасни дека суштината е што во договорот од 2011 година секаде стои дека се работи за таблички КС, кои според него се статусно неутрални, но дека Приштина тоа го негира.
„Ние постојано инсистираме на тоа, затоа бараме таблички КС, а тие тврдат дека ги нема и дека се откажани. Приштина бара таблички РКС, а тоа е недозволиво бидејќи не е статусно неутрално затоа што тоа значи Република Косово. Нивниот план е да ги остават Србите да го напуштат Косово со нивните регистарски таблички, но потоа да не дозволат да се вратат со истите тие таблички“,
додаде тој.
Тој посочи дека, според тоа, Србија нема да дозволи прогон или убивање на својот народ.
„Нема да има повторување на 2004 година, ниту пак слични акции. Ние сме тука да бидеме со нив не само кога е лесно, туку и кога е тешко и ќе бидеме целосно со нашиот народ. Нема предавање, повторувам, нема предавање“,
нагласи претседателот на Србија.
Пред седницата на Советот за национална безбедност Вучиќ се сретна со претставниците на Србите од Косово. Претседателот на Српската листа, Горан Ракиќ, по средбата изјави дека од претседателот добиле цврсти гаранции дека Србија ќе застане покрај својот народ на Косово.
„На насилството ќе одговориме со мирен и демократски протест на народот“,
рече Ракиќ.
Рокот за пререгистрација на автомобилите со таблички РКС започна на 1 септември, а завршува на 31 октомври.
Амбасадата на САД во Косово вчера повика одлуката на косовската влада за пререгистрација на автомобилите да се спроведе мирно и да не се придонесува за раст на тензиите. Како што пренесе РСЕ, амбасадата соопшти дека САД, заедно со европските партнери, сметаат дека одлуката на Владата на Косово е во согласност со Бриселските договори и дека „во принцип немаат забелешки за тоа”.
„Но, заедно со нашите меѓународни партнери побаравме десетмесечно одложување на спроведувањето на одлуката”,
се наведува во одговорот на амбасадата.
Европската Унија минатата недела побара рокот на пререгистрација на возилата на Косово да се продолжи за десет месеци. Како што посочи портпаролот на унијата, Петер Стано, одлуката на Косово за пререгистрација е легитимна, но важно е да се даде доволно време за спроведување на овој план, да се подготви и спроведе во тесна консултација со граѓаните и во согласност со европската пракса. .
„Заклучоците за слободата на движење од 2016 година содржеа рокови за пререгистрација, кои треба да дадат насоки. Затоа од почетокот на овој процес и препорачавме на Владата на Косово да одреди рок од 12 месеци за пререгистрација. По истото образложение, сега бараме од Владата на Косово да го одложи постоечкиот рок за десет месеци“,
рече Стано.
Претседателката на Европската комисија Урсула фон дер Лaјен на турнејата низ Западен Балкан денеска престојува во Приштина, од каде порача дека се работи на решенија кои се применливи во контекст на дијалогот меѓу Белград и Приштина.
Таа изрази уверување дека проблемот со регистарските таблички ќе се реши без криза.
„Многу е важно правилата да се јасни и мора да се почитуваат. Транзицијата се одвива како што треба и убедена сум дека ќе се најде решение“,
рече таа, пренесe „Економија онлајн“.