На видеото, објавено на фејсбук-профилот на риболовното друштво „Трофта“, се гледа како мажот застанува со бело комбе на мостот на реката Радика, кај каменоломот во Косоврасти, од него вади вреќи и кутии со отпад и ги фрла во реката
Дебарското спортско риболовно друштво „Трофта“ (Пастрамка) денеска објави видео од непознато лице како фрла отпад во реката Радика.
На видеото, објавено на фејсбук-профилот на риболовното друштво, се гледа како мажот застанува со бело комбе на мостот на реката Радика, кај каменоломот во Косоврасти, од него вади вреќи и кутии со отпад и ги фрла во реката.
Од друштвото велат дека станува збор за срамен чин, кој покажува непочитување кон природата, рибите и нашата иднина.
„Срамно! Ова е реката Радика – една од најчистите и најубавите реки во Македонија. Да фрлаш ѓубре во реката не е ‘ништо страшно“ – тоа е срам и непочитување кон природата, рибите и нашата иднина. Радика не е место за ѓубре“,
се наведува во во објавата.
Од друштвото упатуваат порака до граѓаните да се однесуваат одговорно и да го заштитат она што природата ни го дарувала.
Дел од медиумите објавија одговор на прашање упатено до Секторот за внатрешни работи (СВР) Охрид во врска со случајот, во кое се вели дека се преземаат мерки за утврдување на идентитетот на лицето.
„Во врска со видеото за кое прашувате ве известуваме дека СВР Охрид презема мерки за утврдување на идентитетот на лицето, по што јавноста ќе биде соодветно известена“,
навеле од оттаму, пренесе порталот „Прес 24“.