На претпладневната координација кај спикерот Џафери се разговара кога да почне седницата на која треба да се гласа за законите за ЈО и за Совет на јавни обвинители и дали ќе има седница за разрешување на министерката Мизрахи
Во парламентот моментно е во тек координација на спикерот Талат Џафери со шефовите на пратеничките групи на која се договара распоредот на седници што треба да се одржат најдоцна до крајот на оваа седмица. Според информации на „360 степени“, досега не е договорено кога точно ќе се распушти парламентот за изборите да се одржат на 12 април, ама спикерот Талат Џафери потврдува дека краен рок за распуштање е недела.
Моментно се разговара кога да почне продолжението на седницата на која треба да се гласа за законите за јавното обвинителство и за Совет на јавни обвинители. Треба да се донесе одлука и дали ќе биде закажана седница за разрешување на министерката за труд и социјална политика Рашела Мизрахи, по предлог на техничкиот премиер Оливер Спасовски.
Не е исклучено на гласање да биде ставен и новиот закон за одбрана, а останува неизвесноста околу измените на Изборниот законик согласно со препораките на ОБСЕ/ОДИХР.
Во меѓувреме, стигна вест од ВМРО-ДПМНЕ дека останува во парламентот до неговото распуштање, за што од партијата очекуваат да се реализира до крајот на неделава. Сепак, пратениците на ВМРО-ДПМНЕ Лилјана Кузмановска и Влатко Ѓорчев, кои претседаваат со комисиите за финансирање и буџет и за труд и социјална политика денеска ги откажаа трите седници на овие тела, кои се пролонгираа повеќепати во изминатиот период.