Во болниците низ земјава вкупно се хоспитализирани 669 пациенти кои се суспектни или заразени со ковид-19, покажува денешниот извештај на Министерството за здравство.
Најмногу пациенти се сместени на Инфективната клиника во Скопје – 152. Од нив 110 се на кислородна поддршка, а на механичка вентилација нема ниту еден пациент.
Во Градската општа болница „8 Септември“ има 49, од кои двајца пациенти се на респиратор.
Пациенти во Скопје се хоспитализирани во болницата во Козле. Таму има 9 деца и 9 мајки кои се позитивни на вирусот, а 6 деца и 4 мајки се суспектни.
Во болницата во Битола се хоспитализирани 72, а во штипската има 48 пациенти.
На инфективните одделенија во Тетово, Охрид, Велес, Куманово, Прилеп, Гостивар, Струмица, Струга, Кочани, Гевгелија, Дебар, Кичево и Кавадарци се сместени вкупно 320 позитивни и сомнителни на ковид-19.
За состојбата во болниците денеска зборуваше и министерот Венко Филипче кој рече дека во модуларната болница поставена кај Инфективна има уште неколку слободни места. Најави дека нови пациенти ќе почнат да се примаат и на Клиниката за неврологија и Клиниката за дерматологија, каде што има пристап до централен довод за кислород.