Ќе имаме средба со премиерот на Албанија, но не кога тоа е во полза и во интерес на ДУИ. ДУИ бара помош од регионот, но не гледаме дека сега треба да им излеземе во пресрет, велат од движењето Беса
Членовите на Беса добиле покана за утрешната средба на лидерите на албанскиот политички блок од Северна Македонија со албанскиот премиер Еди Рама, но оттаму велат дека нема да присуствуваат на неа.
Пратеникот од движењето Беса, Фадил Зендели, оценува дека оваа средба е во полза на ДУИ и дека секогаш кога оваа партија има внатрешни проблеми се одржуваат вакви средби во Тирана.
„Имаме покана од премиерот на Албанија за утрешната средба. Централното претседателство одлучи дека сме спремни да соработуваме со Република Албанија и со премиерот Рама, но како политичка партија не сме спремни да седнеме на иста маса со ДУИ. Во овој момент на ДУИ ѝ е потребна средба во Тирана. Не гледаме дека на некој друг му е потребна таква средба. ДУИ има интерес од една таква средба, исто како што ја злоупотреби таа во 2017 година за свои цели. Секогаш кога имаат свои внатрешни проблеми со свои внатрешни противници, ДУИ бара помош од регионот. Не гледаме дека сега треба да им излеземе во пресрет“,
вели Зендели.
Тој потенцира дека кога политичките партии на Албанците барале да седнат на маса да се договорат за некои прашања, лидерот на ДУИ никогаш не бил подготвен да зборува со нив, а дури и во некои медиуми ги има навредено нарекувајќи ги злобници.
„Ако сме ние злобници, тогаш не гледаме никаква причина да седнеме со него на иста маса кога нему му е потребно“,
истакна пратеникот на Беса.
Движењето Беса, додаде тој, има сопствени автономни политики и смета дека треба да да се одвива внатре.
„Ќе имаме средба со премиерот на Албанија, но не кога тоа е во полза и во интерес на ДУИ“,
додава пратеникот Зендели.
Лидерите на политичките партии на Албанците во земјава утре се очекува да заминат на заедничка средба во Тирана на покана на албанскиот премиер Еди Рама.
Покана за средбата добиле лидерот на ДУИ, Али Ахмети, претседателот на Алијанса за Албанците, Арбен Таравари, првиот човек на Беса, Билал Касами, претседателот на Алтернатива, Африм Гаши, како и лидерот на Демократската партија на Албанците (ДПА), Мендух Тачи.
Засега се нејасни поводот и причината поради кои е свикана средбата.
Според албанските медиуми, се работи за неформална средба на која, меѓу другото, ќе стане збор за политичката состојба во Северна Македонија, но и за други прашања од политичката сцена на Балканот.
Минстерот за надворешни работи Бујар Османи денеска рече дека средбата што за утре ја најави премиерот на Албанија, Еди Рама, со лидерите на албанскиот политички блок од Северна Македонија ќе биде новогодишна средба со цел размена на мислења за актуелностите во регионот, очекувањата во Новата година, посакување на една подобра соработка во текот на оваа година.
Шефот на македонската дипломатија не смета дека треба да се создаде некаква конспирација по однос на овие средби и додава дека сите средби во кои се комуницира, во кои се разменуваат идеи, информации, ставови се од благосостојба на нашата земја, но и на другите.
Алијанса за Албанците и Алтернатива се „за“ средба на сите партии од албанскиот блок во земјава со албанскиот премиер Еди Рама.