Нападите доаѓаат откако претседателот Доналд Трамп претходно денеска во објава на неговата социјална платформа го нарече нападот со беспилотни летала врз бродови во Ормускиот теснец „глупаво кршење“ на договорот за ставање крај на војната со Иран, но без да даде индиции дали случајот ќе предизвика враќање на непријателствата
Централната команда на војската на Соединетите Американски Држави (ЦЕНТКОМ) соопшти дека нејзините сили денеска извршиле напади врз ирански воени цели околу Ормускиот теснец како одговор на вчерашниот напад на Техеран врз комерцијален брод во близина на клучниот воден пат, објави Си-ен-ен.
Според соопштението на Централната команда што го пренесува телевизијата, американски авиони погодиле складишта за ракети и беспилотни летала, како и крајбрежни радарски позиции на иранските сили.
„Неоправданата агресија врз комерцијалниот брод од страна на иранските сили очигледно го прекрши прекинот на огнот“,
се наведува во соопштението.
— U.S. Central Command (@CENTCOM) June 26, 2026
Нападите доаѓаат откако претседателот Доналд Трамп претходно денеска во објава на неговата социјална платформа го нарече нападот со беспилотни летала врз бродови во Ормускиот теснец „глупаво кршење“ на договорот за ставање крај на војната со Иран, но без да даде индиции дали случајот ќе предизвика враќање на непријателствата.
„Исламската Република Иран истрела најмалку четири еднонасочни дронови врз бродови што го преминуваа Ормускиот теснец. Еден од дроновите ја погоди горната палуба на голем и многу скап брод за превоз на товар. Беше предизвикана штета, но бродот можеше да продолжи по својот пат. Соборивме уште три дрона. Очигледно, ова е глупаво кршење на нашиот договор за прекин на огнот“,
напиша Трамп.
Неколку часа подоцна, американскиот претседарел изјави дека инцидентот покажал дека Иран задржал дел од своите воени капацитети, и покрај повеќемесечната војна со САД.
„Сè уште се бориме. Тие имаат некаква способност, не многу. Тие не победуваат или нешто слично, но имаат некаква способност; сè уште можат да пукаат. Никој не го очекуваше тоа. Не може да се прават такви работи“,
рече тој за време на настан со група конзервативни христијани во Вашингтон.
Подоцна, за време на настан во Овалната соба, Трамп не кажа како или дали САД би можеле да реагираат на инцидентот, кој се случи еден ден претходно, туку се осврна на тековните тешкотии околу враќањето на сообраќајот низ Ормускиот теснец на ниво пред почетокот на војната.
„Не ми се допаѓа фактот што вчера пукаа“,
рече Трамп во одговор на прашањето дали смета дека прекинот на огнот е сè уште во сила.
На инсистирање на новинарите да одговори дали ќе уследи некаков одговор од САД, американскиот претседател само рече: „Ќе дознаете“.
Инаку, станува збор за прв инцидент откако САД и Иран потпишаа меморандум за разбирање за отворање на теснецот и започнување подетални преговори за нуклеарната програма на Иран. Трамп понуди малку знаци дека е подготвен да ја продолжи војната, за која минатата недела призна дека можела да доведе до економска катастрофа доколку продолжела, наведува Си-ен-ен.
Договорот меѓу САД и Иран предвидува враќање на сообраќајот низ теснецот на исто ниво како пред почетокот на војната, но во него нема детали како тоа ќе се постигне.
Двете страни понудија различни ставови за тоа дали Иран ќе може да наплаќа такси за бродовите што минуваат. Трамп инсистира теснецот да остане бесплатен, но Техеран тврди дека има право да им наплаќа такса на бродовите што минуваат.
Нападот на комерцијалниот брод вчера се случи неколку часа откако моќната Иранска револуционерна гарда предупреди дека на бродовите ќе им биде даден безбеден премин само преку иранските рути во теснецот, оспорувајќи го тврдењето на администрацијата на Трамп дека водниот пат е повторно слободен и отворен. Инаку, САД ја прекинаа блокадата на иранските пристаништа откако беше потпишан меморандумот за разбирање.