Опозицијата бара итна и неодложна седница за законот што го подготви, за кој собираше и граѓански потписи
ВМРО-ДПМНЕ го поднесе денеска во Собранието предлог-законот за поништување на Законот за попис, според кој веќе се спроведува првата фаза од статистичката операција во земјава.
Засега нема информации дали предлог-законот е поднесен од група пратеници, со оглед на тоа што ВМРО-ДПМНЕ собираше граѓански потписи на повеќе пунктови што сама ги постави, откако спикерот Талат Џафери ја врати иницијативата на опозицијата како неусогласена со Уставот. Нема ниту информации дали предлог-законот е поднесен со уставното име на државата Република Северна Македонија за да може да биде ставен во процедура.
ВМРО-ДПМНЕ не успеа попладнево да го образложи предлог-законот бидејќи денешната собраниска седница беше прекината пред утврдувањето на дневниот ред, откако премиерот Зоран Заев побара збор, кој неочекувано се појави во Собранието.
„Поттикнати од огромната поддршка од граѓаните, но и од нашата борба против ваков фингиран попис, го поднесовме овој предлог на закон за престанување на важењето на Законот за попис и бараме закажување итна и неодложна седница во Собранието на Република Македонија, на која ќе се изгласа овој закон и ќе се стопира овој политички попис и оваа национална катастрофа во најава“,
изјави пратеничката од ВМРО-ДПМНЕ, Иванка Василевска.
Таа потенцира дека ВМРО-ДПМНЕ и пратеничката група на ВМРО-ДПМНЕ не се против попис на населението бидејќи, како што рече, таква статистичка операција е многу важна и неопходна за земјата.
„Но сакаме да упатиме силна порака дека ние сме и ќе бидеме против фингиран и наместен попис со кој власта ќе фингира бројки кои се резултат на партиско-коалициски пазарења и договори на штета на сите граѓани на Република Македонија“,
рече Василевска.