Пратеникот и член на ИК на ВМРО-ДПМНЕ, Миле Лефков, на денешната прес-конференција обвини дека фирмата на кумот на премиерот била ангажирана да врши надзор на проект за изградба и реконструкција на улично осветлување во Општина Гази Баба, но работата иако не била завршена, односно бандерите и светилките што требало, а не биле поставени сепак биле наплатени. Лефков праша дали тоа ќе се случело без потпис од фирмата на кумот на Ковачевски
Опозициската ВМРО-ДПМНЕ денеска излезе со нови детали обвинувања со аферата против премиерот Димитар Ковачевски што самите ја нарекоа „Броило“, а во која тврдат дека премиерот и неговиот кум преку две фирми станале доминантни во енергетскиот бизнис во земјава и „вртат милионски суми“, од кои дел се од државни тендери.
Пратеникот и член на Извршниот комитет на партијата, Миле Лефков, на денешната прес-конференција обвини дека еден ден откако Ковачевски станал мандатар за состав на нова Влада на 29 декември, минатата година, фирмата основана од него „Пиксел груп“ добила исплата на државна помош од над 203 илјади евра.
„Значи Ковачевски со мандат за премиер, а неговата ‘Пиксел’ добива државна помош од огромни 203 илјади евра. Ова е најголемата во низа исплати од над половина милион евра извршени од владата и ФТИР кон `Пиксел груп` основана од Ковачевски во периодот од 2019 до 2021 година“,
рече Лефков.
Пратеникот и член на ИК на ВМРО-ДПМНЕ на денешната прес-конференција обвини дека фирмата на кумот на премиерот била ангажирана да врши надзор на проект за изградба и реконструкција на улично осветлување во Општина Гази Баба, но работата иако не била завршена, односно бандерите и светилките што требало, а не биле поставени сепак биле наплатени. Лефков праша дали тоа ќе се случело без потпис од фирмата на кумот на Ковачевски.
„Покрај земените два милиони евра државни тендери, фирми од соларниот картел овозможиле богатење и на други фирми и лица, и со нивна помош се испумпани милиони народни пари. Се наметнува сомнение дека преку фирмата ‘КМГ ЕОЛ квазар’ на кумот на Ковачевски, Горанчо Паунов, овозможена е можна злоупотреба во општина Гази Баба додека градоначалник на општина бил кадар на СДС. Имено фирмата на кумот на Ковачевски е надзор на проектот за изградба и реконструкција на улично осветлување, а заврши во обвинителство, заради незавршени работи, кои биле наплатени со помош на потписот на надзорниот орган претставуван од кумот на Ковачевски“,
истакна Лефков.
Пратеникот на ВМРО-ДПМНЕ додава дека со проектот за улично осветлување во Гази Баба, наплатени биле бандери и светилки кои воопшто не биле поставени, а сето тоа, како што посочи, не би можело да се случи без потпис од фирмата на кумот на Ковачевски.
„Се наметнува основа за верување и прашањето: дали потписот на кумот на Ковачевски овозможил злоупотреба во постапка од над 11 милиони денари? Со ова гледаме дека соларниот картел, покрај директна корист за себе, има индикации дека помогнал и при правење на низа други незаконски дејствија, со кои се испумпани милиони народни пари. Уште во колку вакви криминални тендери е вмешан кумот на Ковачевски, и колкав криминал е овозможен? Ковачевски да почне да дава одговори, а ние продолжуваме со детали“,
порача Лефков.
Опoзициската ВМРО-ДПМНЕ ја отвори аферата, која ја нарекоа „Броило“ во неделата, кога пратеникот и член на ИК на партијата излезе со обвинувања до премиерот Ковачевски, според кои фирми основани од него и негови семејни врски „вртат милионски суми во енергетскиот бизнис“, односно се вмешани, како што тврдат од партијата, во бизниси во вредност од 26 милиони евра.
Наредниот ден, од партијата излегоа со нови обвинувања кои според нив покажуваат дека фирмата „КМГ ЕОЛ квазар“, основана од Горанчо Паунов – кумот на премиерот Димитар Ковачевски, добила четири милиони евра само од ЕВН и државни тендери. Над два милиони од оваа сума, според опозицијата биле само од тендери од државата.
Истиот ден, односно во понеделникот, оваа недела премиерот одговарајќи на новинарски прашања, ги оцени како очаен обид обвинувањата на опозициската ВМРО-ДПМНЕ дека заедно со неговиот кум имаат бизнис во енергетскиот сектор вреден 26 милиони евра и побара од лидерот на опозицијата Христијан Мицкоски и членовите и пратеници на ВМРО-ДПМНЕ, кои излегоа со аферата „Броило“, да му се извинат, инаку, како што индиректно најави, ќе бара одговорност од нив „врз основа на законските регулативи во државата.
Со тужби, доколку не добијат извинување, во понеделникот се заканија и од компаниите „Пиксел груп“ и „КМГ ЕОЛ квазар“, кои преку заедничко соопштение најостро го осудија „секој обид за дискредитација и обид за нашата групација да се доведе во корелација со каква било политичка структура“.