Резолуцијата што опозициската партија ќе ја поднесе во парламентот ќе била базирана на дефинициите на МАНУ и на УКИМ, а очекувањата се да се постигне државен консензус за позициите кои ќе се бранат во преговорите со источниот сосед и од кои оваа и секоја идна влада не треба да се повлече
ВМРО-ДПМНЕ ќе поднесе резолуција во Собранието и ќе побара државен консензус за заштита на црвените идентитетски линии во спорот со Бугарија, брифираат од опозициската партија. Од партијата очекуваат да се дефинираат црвените линии во однос на јазикот, историјата и идентитетот.
Целта е, како што велат од ВМРО-ДПМНЕ, да се побара општествен консензус и да се исцртаат позициите кои ќе се бранат во преговорите со источниот сосед од кои оваа и секоја идна влада не треба да се повлече, бидејќи тоа би предизвикало нарушување на државните интереси.
Од опозициската партија велат дека дефинициите што ќе се употребат во резолуцијата се истите што се употребени од МАНУ и од УКИМ, како најреномирани научни институции, и ќе говори за намерата да се вклучат сите напредни елементи што треба да предводат во заштитата на државните интереси.
Од ВМРО-ДПМНЕ посочуваат дека бугарските ставови се прецизно дефинирани во бугарската декларација и во она што синхронизирано го говорат бугарскиот претседател и владата, а проблемот е што македонските позиции се нејасни и свесно се допушта тие да бидат флексибилни и на штета на идентитетските обележја.
„Одговорна држава би постигнала општествен и национален консензус за вака важни прашања“,
велат од ВМРО-ДПМНЕ, најавувајќи прес-конференција на партискиот лидер Христијан Мицкоски во текот на денот на оваа тема, и нагласуваат дека ваквиот предлог доаѓа по изјавата на државната секретарка на Португалија дека македонскиот јазик потекнува од бугарскиот, како од засилената негаторска реторика од источниот сосед.