Според нив, ова се сериозни финансиски средства и затоа Филипче има обврска пред граѓаните да даде одговори на неколку прашања – од кога ги знае овие информации, зошто молчел досега, кои документи и докази ги поседува и кој го потпишал договорот и врз основа на што
Владејачката ВМРО-ДПМНЕ ја повика опозициската СДСМ да ги достави до Обвинителството сите докази што ги откриваат за скандалот тежок 37 милиони евра во Министерството за одбрана, а кои велат дека се поврзани со поранешната министерка и актуелна пратеничка Славјанка Петровска.
„Филипче изнесе сомнежи поврзани со пратеничката Славјанка Петровска, поранешен министер за одбрана и дел од ‘Платформата 12:05’, околу набавката на хеликоптери и договор за кој, според неговите јавни наводи, постоела разлика од дури 37 милиони евра“,
велат од ВМРО-ДПМНЕ.
Според нив, ова се сериозни финансиски средства и затоа Филипче има обврска пред граѓаните да даде одговори на неколку прашања – од кога ги знае овие информации, зошто молчел досега, кои документи и докази ги поседува и кој го потпишал договорот и врз основа на што.
„Ако Филипче навистина располага со информации за сомнежи за криминал, тогаш нема простор за селективност, калкулации или меѓупартиски пресметки. Нека ги достави информациите до надлежните институции и нека ги презентира пред обвинител“,
велат од владејачката ВМРО-ДПМНЕ.
Јавното обвинителство, додаваат од партијата, согласно своите надлежности, треба да ги провери наводите и да утврди дали постојат основи за постапување.
Исто така, од партијата го повикуваат лидерот на СДСМ ако има информации и за други случаи да ги пријави и да не застанува на еден случај.
„Ако има информации или сомнежи за други незаконитости во СДС, нека ги објави и нека ги достави до надлежните институции. Граѓаните заслужуваат целосна транспарентност и одговорност за секој сомнителен договор, секој потрошен денар и секоја одлука со која можеби е оштетен јавниот интерес. Јавноста има право да знае што се случувало“,
велат од партијата.
Откако од платформата „Разговори за иднината 12:05“ минатата недела побараа структурни реформи во партијата, лидерот на СДСМ, Венко Филипче на прес-конференција изнесе жестоки критики кон дел од претставниците на Платформата, наведувајќи по име и презиме кој што направил или не направил додека бил на висока функција во Социјалдеморатскиот сојуз на Македонија.
Во однос на пратеничката и поранешна министерка за одбрана Славјанка Петровска, лидерот на СДСМ рече оти се прашува дали можеби причина за нејзиното учество во Платформата е изјавата на актуелниот министер за одбрана Владо Мисајловски дека неговата претходничка на функцијата потпишала за 37 милиони евра поскап договор за набавка на хеликоптери иако надлежната комисија донела друга одлука.