Вработена на Клиниката за инфективни болести и фебрилни состојби (КИБФС) пројавила симптоми на конго-кримска хеморагична треска откако инфекцијата беше детектирана кај 27-годишна жена од Штип, информираа пред два дена од Министерството за здравство. По ова, екипа на епидемиолози од Центарот за јавно здравје извршиле епидемиолошки увид и анкети на контакти, по што биле издадени 11 решенија за исто толку лица кои ќе бидат под 14-дневен здравствен надзор
Власта предводена од ДУИ и СДСМ седум години не води грижа за граѓаните, а здравствените власти евентуално го вклучуваат алармот само ако има починато лице, обвинија денеска од ВМРО-ДПМНЕ.
Оттаму додаваат дека власта не ја контролира ситуацијата со заразени од конго-кримска хеморагична треска.
„Почина лице од конго-кримска хемогарична треска и вообичаена реакција од надлежните, сè е под контрола. Се зарази вработена на Инфективната клиника. И повторно сѐ е под контрола. Или 40 лица се под здравствен надзор кои имале контакт со заразената. И сѐ така во круг. Ништо не сопира, ништо не контролираат. Секојдневно сме сведоци само на лаги! Зошто? Затоа што информациите велат дека сите кои биле во контакт со вработената на Инфективна клиника, одат на работа“,
соопштија од ВМРО-ДПМНЕ.
Комисијата за интрахоспитални инфекции на Клиниката е на одмор, на Клиниката нема директор, никој не знае каде е. Државниот санитарен и здравствен инспекторат едвај покажува знаци на живот, додаваат од најголемата опозициска партија.
„Заклучок. Вообичаено ништо не функционира, Владата на ДУИ и СДС реагира само на местење тендери, за крадење на народот, длабоко е во корупција и криминал. Човечкиот живот за нив не вреди“,
се наведува во соопштението на ВМРО-ДПМНЕ.
По ова со остра реакција се јавија од Министерството за здравство (МЗ), од каде што ја обвинија ВМРО-ДПМНЕ дека шири несигурност и паника меѓу граѓаните, како и меѓу здравствените работници.
„Министерството за здравство и сите здравствени институции навремено и професионално одговорија на појавувањето на треската. Секојдневно транспарентно ја информираме јавноста за состојбата со пациентите и за изолираните контакти кои се под лекарски надзор. Лага е дека надлежните не ги преземаат сите мерки како би се спречило ширење на заразата, како и дека се шири треската. Нашите здравствени работници го даваат максимумот да одговорат на потребите на пациентите. ВМРО-ДПМНЕ да престане со празни, неосновани соопштенија, да се обидуваат да шират страв меѓу граѓаните. Тоа е неодговорно и ниско ниво на политичка манипулација на чувствителни теми“,
соопштија од МЗ.
Вработена на Клиниката за инфективни болести и фебрилни состојби (КИБФС) пројавила симптоми на конго-кримска хеморагична треска откако инфекцијата беше детектирана кај 27-годишна жена од Штип, информираа пред два дена од Министерството за здравство. Заразената пациентка пројавила симптоми на деветтиот ден од надзорот и е идентификувана како контакт со среден ризик.
Откако болничарката добила позитивен резултат на испитувањата за конго-кримска хеморагична треска, екипа епидемиолози од Центарот за јавно здравје извршиле епидемиолошки увид и анкети на контакти, по што биле издадени 11 решенија за исто толку лица кои ќе бидат под 14-дневен здравствен надзор. Овој надзор не подразбира класична изолација, туку овие лица ќе треба да се јавуваат и да бидат во постојан контакт со епидемиолозите, но воедно треба да избегнуваат контакт со други лица.
Претседателот на Комисијата за заразни болести, Злате Мехмедовиќ, вчера информира дека Институтот за јавно здравје веќе дал препораки во однос на тоа што треба да се направи за да се превенира болеста. Според него, од информациите со кои располагаат, првиот случај, односно починатата жена се заразила со директен контакт со крлеж, додека, пак, вториот случај со здравствениот работник најверојатно е преку пренос на контаминирана крв.
Тој рече дека не очекуваат да има повеќе случаи на заразени со конго-кримска хеморагична треска.