Со должно внимание ги земаме предвид укажувањата на „Репортери без граници“ и ќе продолжиме, во соработката со медиумските организации и со медиумите, да создаваме услови за натамошни подобрувања, велат од Владата откако оваа невладина го објави новиот извештај за слободата на медиумите, според кој, земјава забележала скок од три места во однос на лани и сега се наоѓа на 92. место.
„Во однос на написите или толкувањата на извештајот во делот на владино рекламирање, Владата потенцира дека владиното рекламирање кое претходната власт го користеше за влијанија врз медиумите е целосно стопирано уште во 2017 година и дека од тогаш до денес не постои владино рекламирање во медиумите. Дополнително, ја потсетуваме јавноста дека реформите на националниот радио-телевизиски сервис и на регулаторното радиодифузно тело не се реализирани исклучиво поради блокадите од страна на политичката партија ВМРО-ДПМНЕ во Собранието“, велат од Владата.
Оттаму потсетуваат дека го поздравиле создавањето Регистар на професионални онлајн-медиуми од страна на новинарските организации во земјава, што е позитивно оценето во извештајот на „Репортери без граници“.
Пред годишниот напредок од три места, Македонија лани забележа скок од 14 места на оваа ранг листа.