Македонија за една година се искачи три места погоре на листата на слобода медиумите за 2020, која ја изготвува невладината организација Репортери без граници со седиште во Париз. Од 95-то, лани земјава сега е рангирана на 92-то место со средна оценка од 31,28 поени, од вкупно 180 држави и територии колку што се опфатени со анализата.
Во делот за Македонија, акцентот се става на рекламирањето во медиумите, саморегулацијата и условите за работа на новинарите и медиумските работници.
За рекламирањето во медиумите, „Репортери без граници“ во извештајот посочуваат дека актуелната влада го намалила државното рекламирање во медиумите, што беше моќна алатка на претходната власт за контрола на медиумите и злоупотреба на државните фондови. Но, сепак, се нагласува дека општините и натаму можат да се рекламираат во локалните медиуми, што според оваа организација и натаму таа останува алатка за притисок.
„Исто така, постоеше потенцијално ризичен потег од владејачката партија да плаќа реклами во медиумите за да ги рекламира достигнувањата на Владата, практика што беше осудена од Здружението на новинари на Македонија (ЗНМ)“,
се констатира во извештајот.
Како позитивен пример во создавањето поволни услови за медиумите, организацијата го наведува создавањето на Регистарот на професионални онлајн-медиуми, во кој има околу 70 члена, иницијатива која промовира саморегулација на овие медиуми со почитување на Кодексот на новинарите.
„Репортери без граници“ констатираат дека има напредок и во однос на услови за работа на новинарите и тука се посочуваат Повелбата за услови за работа за новинарите, како и нацрт фер-договори за вработување во дигиталните медиуми промовирани од Независниот синдикат на македонски новинари и медиумски работници (ССНМ) во соработка со ЗНМ и СЕММ, кои се однесуваат на почитување на работнички права, слободата на изразување, како и етички и професионални стандарди на сите новинари и медиумски работници.
Сепак, оваа организација, констатира дека кај високи владини претставници постои тенденција да ги загрозуваат и напаѓаат новинарите.
„Културата на неказнивост е добро вкоренета и сè уште е пречка за безбедноста на новинарите. Бројот на физички напади врз новинарите се намали, но постои пораст на случаи на компјутерски и вербални напади“,
констатираат „Репортери без граници“.
Пред нас се Грција, Косово и Албанија
Според според индексот за слобода на медиумите, од соседството пред Македонија се Грција на 65-то, Косово на 70-то и Албанија на 84-то место. Следна е Србија, на 93-то место, Црна Гора на 105-то и Бугарија на 111-то место.
Прва на листата е Норвешка, а по неа се Финска, Данска, Шведска и Холандија. Последни на 177-то место се Кина, Еритреја и Туркменистан.
*Поврзана вест