Поголем дел од интервјуто на премиерот Зоран Заев за „Дојче веле“ беше посветен на борбата против корупцијата. Новинарката потсети дека тој дошол на власт со ветување дека ќе се избори со корупцијата. Таа побара објаснување од премиерот за последниот Индекс за перцепција на корупцијата на Транспаренси Интернешенел каде Северна Македонија е најлошо рангирана досега.
„Тоа говори дека сме отворени, дека општеството е демократизирано и јавноста може слободно да зборува и да коментира. Врз овој извештај, сепак, големо влијание имаше пандемијата. Бизнисите беа стопирани, а податоците биле добиени од само една од стопанските комори. Фокусот на Владата беше да ги користиме и сите меѓународни успешни алатки за борба со криминалот и корупцијата и имаме многу добри резултати. Извештајот на ‘Транспаренси интернешенел’ беше лош за нас, но го прифаќаме како поттик за да одиме чекор по чекор, според насоките што тој ги дава”,
одговори премиерот Зоран Заев во емисијата „Конфликт зоун“ на „Дојче веле“.
Во „вкрстениот распит“ новинарката ги цитираше извешатаите на ЕК и на Греко кои се книжат на негативното салдо на владата. Таа посочи дека од Владата се бара проактивен пристап, особено кога станува збор за неказнивоста на корупцијата на високо ниво, со констатација дека тоа и натаму е проблем.
„Имаме повеќе од пет високи политичари кои се во затвор со конечна одлука од основен и апелациски суд и кои веќе ги отслужуваат своите казни. Ова е голем е успех во споредба со периодот од пред четири години и тоа е многу очигледно. Секој граѓанин може да го следи трошењето на државните пари, сите процедури за набавка се јавни пред да се потпишат и да отпочнат”,
рече Заев.
На новинарското прашање, премиерот Заев информираше дека Северна Македонија и понатаму ги истражува сите легални начини како поранешниот премиер Груевски да биде вратен назад, со цел да ја отслужи казната изречена од судот, но одби да одговори зошто никој до сега не презел никаква одговорност за неговото бегство.
„Сакам да истакнам дека и многу екс министри кои биле луѓе блиски на оваа власт, ги отслужуваат своите казни или се на суд. Имаме многу случаи кои потврдуваат дека владеењето на правото е еднакво за сите. Имаме целосна независност и на судските органи и на органите на прогонот. Побаравме одговорност и од судиите и 12 судии се отповикани заради лошо работење во нивниот мандат“,
рече премиерот Заев.
На констатацијата дека независните тела, како што се Антикорупциската комисија и Државната ревизија имаат многу забелешки, Заев одговори дека владата ги следи нивните инструкциите, бидејќи тие се главни коректори на системските слабости.
Владеењето на правото и еднаквоста пред законите важи за сите без исклучок, истакна премиерот Заев и додаде дека Владата постојано ги следи укажувањата и препораките на независните антикорупциски тела.
Инаку, само во последните месеци власта не ги прифаќаше препораките и забелешките на Антикорупциската комисија. Тие се спротиставија на специјалниот закон за автопатишата со кои се фаворизира американско-турскиот конзорциум Бехтел и Енка и најавија дека ќе побараат од Уставниот суд да ја преиспита уставноста на овој законски акт.
Исто така, поради постоење основи на сомнение за сторено кривично дело злоупотреба на службена положба и овластување од КЗ, ДКСК до Јавното обвинителство достави иницијатива за поведување постапка за кривично гонење службени лица кои со своето постапување, односно не постапување придонеле во 2012 година да се донесе ДУП-от за паркингот кај Холидеј Ин кој е неусогласен со Генералниот урбанистички план и да се реализира имотна корист кај сегашните сопственици на парцелата која е дел од ДУП.
На крај, зградите кај Холидеј Ин можеби и немаше да се изградат ако на инвеститорите не им успееше да го купат и државното земјиште на локацијата. Тоа се случи благодарение на законската одредба за дооформување на градежно земјиште, која му дозволува на секое лице да го откупи државното земјиште на една градежна парцела ако тоа лице, во своја сопственост, има најмалку 30% од таа градежна парцела. Во таквите случаи земјиштето не оди на наддавање, туку се плаќа по однапред утврден ценовник каде цената по метар квадратен, барем за општина Центар, е многу пониска од пазарната.