„360 степени“ детално ја провери имотната состојба што Рашковски ја пријавил во Антикорупциската комисија. Од документите што ги обезбедивме преку барање за пристап до информации од јавен карактер, се гледа дека таму го нема џипот што го вози
Станува збор за „Волво XC 90“ од актуелната генерација на моделот. Најновиот основен модел вреди 74 000 евра
Луксузен спортски теренец, знаменосец во понудата на шведскиот бренд „Волво“ – XC 90. Ваков џип вози Драги Рашковски, секретар во кабинетот на премиерот, а такво возило не фигурира во неговиот анкетен лист.
Додека Антикорупциската комисија го чешла имотот на Рашковски, а Обвинителството за гонење организиран криминал води предистрага за набавката на софтверот за сообраќајни прекршоци, „360 степени“ ги провери гласините што стигнаа до нас – дека поранешниот генерален секретар на Владата користи возило што не е пријавено во ДКСК.
И „црно на бело“, на терен, се потврдија таквите тврдења.
Џипот е редовно паркиран во близина на живеалиштето на Рашковски во Скопје. Нашите проверки покажаа дека тој не го користи ова возило кога оди на работа во Владата, туку главно во приватното време.
Оваа снимка ја направивме за време на викенд. Околу пладне, со семејството, се упати кон џипот кој ги чекаше на паркингот на кој вообичаено го оставаат. На возачкото седиште во луксузното „Волво“ седна Рашковски.
Станува збор за „Волво XC 90“ од актуелната генерација на моделот. На официјалната страница на „Волво“ овој џип е опишан како спој меѓу совршена безбедност, удобност и елегантeн дизајн, со иновативна технологија и внатрешност изработена од врвни материјали. Најновиот основен модел вреди 74 000 евра.
„360 степени“ детално ја провери имотната состојба што Рашковски ја пријавил во Антикорупциската комисија. Од документите што ги обезбедивме преку барање за пристап до информации од јавен карактер, се гледа дека таму го нема џипот што го вози.
Но, има нешто друго – а тоа е очигледната љубов на Рашковски кон брендот „Волво“. Во анкетниот лист доставен во времето кога беше генерален секретар на Владата, Рашковски пријавил дека „Волво XC 90“ на име на сопругата. Но, тој бил од старата генерација на овој модел, произведен во 2005 година, а Рашковски пријавил дека го продале кон крајот на 2017 година.
Во актуелната имотна состојба на Рашковски има уште едно „Волво„ – старо 35 години, чија вредност е помалку од две илјади евра. Рашковски пријавил дека во моментов поседува и „BMW“ што го купил лани за околу 12 000 евра и два мотора – „Хонда“ и „БМВ“ со вкупна вредност од 17 000 евра.
За џипот што сега го вози секретарот во кабинетот на премиерот, според држачот на регистарските таблици, може да се заклучи дека е купен од домашен дилер на „Волво“. Паѓа во очи и тоа што пријавеното „BMW“ е со регистрарски таблички од Струмица, каде се уште е официјалната адреса на живеење на Рашковски според Избирачкиот список, додека непријавениот џип има скопски таблички.
Како го стекнал и зошто ова возило го нема во регистарот на ДКСК? Рашковски одлучи да молчи на нашите прашања.
Во МВР, очекувано, ни рекоа дека не можат да ни кажат кој е сопственик на возилото, бидејќи станува збор за лични податоци. За секој случај, се обративме и со барање за слободен пристап, со објаснување дека податокот ни е потребен во новинарско истражување од висок јавен интерес.
А токму тоа го проверува и Антикорупциската комисија која веќе има отворено предмет за имотот на Рашковски.
„Доколку се случи нешто како што вие кажувате дека е забележано нешто што не е пријавено тука, дека во конкретниот случај е забележан со возило кое што не е пријавено, тогаш ќе провериме чии е тоа возило. Па на тој начин ќе извршиме споредба, вклучена е и контрадикција со субјектот којшто е предмет на работење, така што може да се земе и изјава од Рашковски, кое возило го возел, чии е возилото итн. Ние неколку пати сме укажале дека законот за потекло на имот е многу потребен во нашата држава, токму од овие причини, да се знае кој имот чиј е и од каде потекнува“,
вели Ивановска.
Претседателката на Антикорупциската комисија, Билјана Ивановска, вели дека освен што ќе ја проверуваат реалната имотна состојба на Рашковски, ќе се истражува и дали нејзината вредност ги надминува неговите примања. Во таков случај истрагата ќе оди подлабоко.
„Доколку се забележи дека има отстапување на страна на имотот во однос на примањата тогаш одиме кон проверка на имотот и тогаш веќе се вклучуваат и други институции како финансовата полиција итн“
посочува Ивановска.
Рашковски е во фокусот на јавноста по сториите на „360 степени“ за набавката на софтверот за сообраќајни прекршоци што ниедна институција не го користи. Активностите на надлежните се интензивираа по неговото враќање од одморот во Мексико, а Основното јавно обвинителство за гонење организиран криминал и корупција деновиве ги испраша Оливер Спасовски и Наќе Чулев, а направи претрес и во седиштето на фирмата изработувач на софтверот „Инвока гроуп““, како и во домот на нејзиниот сопственик.
И по серијата корупциски скандали во кои се најде неговото име, за Рашковски кој е еден од најблиските соработници на премиерот, нема барање за морална одговорност. Главниот аргумент на вицепремиерот за борба против корупцијата беше дека за неговата нова функција во кабинетот на премиерот, не важел владиниот кодекс за етичко однесување. Премиерот, пак, повеќе пати изјавуваше дека набавката е чиста.
Од институциите се очекуваат одговори на повеќе дилеми поврзани со Рашковски, меѓу кои и како „седнал“ во луксузното Волво.