Александар Димитриевски ја доби првата награда за серијалот видео-стории и текстови за спорниот тендер за избор на преговарач и надзор над изградбата на автопатите од „Бехтел-Енка“, а Славица Филиповска-Иванова пофалницата ја заслужи за серијалот насловен „Дивоградби на државна земја во заштита на државата“
Новинарот на „360 степени“ Александар Димитриевски ја доби првата награда за најдобра истражувачка сторија на годинешниот конкурс на Македонскиот институт за медиуми (МИМ) за новинарските награди „Никола Младенов 2023“, за сторијата „Од фирма за долна облека до надзор над проект од 1,3 милијарди евра со позајмени експерти“. Серијалот текстови и видео прилози, како што се наведува во образложението за наградата, открива сериозни нерегуларности во тендерската постапка за избор на надзор врз најголемиот и најскап инфраструктурен проект во историјата на земјава – изградбата на автопатите од конзорциумот „Бехтел-Енка“.
„Обелоденувајќи ја намерата за местење на тендерот за надзор, којшто треба да биде единствената контрола врз ‘тајната’ изградба на коридорите 8 и 10 и трошењето на 1,3 милијарди долари јавни пари, новинарот демонстрира исклучителен новинарски ангажман, темелност и систематичност во анализа и проверка на голем број документи и податоци поврзани со спорниот тендер“,
наведуваат од жири комисијата.
Истражувања на „360 степени“ покажаа дека фирмата која треба да заврши најголем дел од работата на надзорот се занимавала со производство на долна облека, дека многу експерти кои според тендерот треба постојано да вршат надзор на терен, всушност, се најмени на најмногу 10 часа неделно и се редовно вработени во други компании, па дури и дека некои веќе се пријавени дека ќе бидат постојано на терен на други градежни проекти.
Пред десет месеци Основното јавно обвинителство за гонење организиран криминал и корупција отвори постапка по допрен глас за набавката на преговарач и надзор за изведбата на автопатските делници од коридорите 8 и 10-д, за кои веќе беше одлучено да ги гради „Бехтел и Енка“, а предмет отвори и Државната комисија за спречување корупција.
Втората награда за најдобра истражувачка сторија ја доби новинарката Ирена Мулачка за серијалот текстови поврзани со случувањата на Клиниката за онкологија, објавени во неделникот „Фокус“, а третата награда беше доделена на новинарот Мартин Пушевски, за серијалот текстови за борбата на граѓаните од Струмичката котлина против отворање на рудникот „Иловица“, објавени на порталот „Дома“.
Тимот новинарки Сашка Цветковска, Елена Митревска Цуцковска, Маја Јовановска и Ивана Настеска од редакцијата на Истражувачката репортерска лабораторија ја доби наградата за најиновативен новинарски производ, за истражувачкиот документарен филм „Убиство во Тетово“, емитуван на МТВ 1 и на веб-страницата на ИРЛ.
Наградата за Најдобра репортерска фотографија ја доби фоторепортерот Томислав Георгиев за фотографијата „Црква“, објавена во интернет-изданието на неделникот „Фокус“.
Пофалница од МИМ за истакнат новинарски ангажман во категоријата најдобра истражувачка сторија беше доделена на новинарката на „360 степени“ Славица Филиповска -Иванова за серијалот од девет стории насловен „Дивоградби на државна земја во заштита на државата“.
Пофалници за истакнат новинарски ангажман во категоријата најдобра истражувачка сторија им беа доделени и на новинарките Мирјана Мирчевска Јовановиќ од Канал 5 и Јасмина Јакимова од БИРН, додека на редакцијата „Види Вака“ и на новинарката Катерина Топалова им беа доделени пофалници за истакнат новинарски ангажман во категоријата најиновативен новинарски производ.
Наградите за најдобра истражувачка сторија МИМ ги доделува традиционално од 2001 година, а од 2013 година наградата го носи името на угледниот новинар и сопственик на неделникот „Фокус“, Никола Младенов.