„Како министерка за одбрана чувствувам голема чест и одговорност што ја предводам одбраната во овие времиња кога соработката и колективната одбрана се поважни од кога било. Нашата интеграција во НАТО не е само потврда за нашата посветеност кон мирот и стабилноста, туку и сведоштво за нашата подготвеност да придонесуваме кон глобалната безбедност“, вели министерката за одбрана
Со членството на С Македонија во НАТО ги имаме сите предиспозиции да бидеме силен гарант на нашата независност и сувереност, рече министерката за одбрана Славјанка Петровска, која по повод 4 април – Денот на НАТО се обрати до граѓаните преку видеопорака.
Оваа година државата одбележува 4 години членство на НАТО, а, како што вели Петровска, со сојузниците во Алијансата одбележуваме 75 години од нејзиното основање.
„Денес, на 4 април, одбележуваме важен момент во историјата на меѓународната безбедност и одбрана, Денот на формирањето на Северноатлантската алијанса. Пред 75 години, нациите основачи на НАТО ја поставија основата за организација што ќе стане камен-темелник на колективна безбедност и демократските вредности ширум светот“,
вели министерката за одбрана во видеообраќањето.
Според неа, тоа е успехот на нашата генерација, но во тој успех се вградија и сите оние што пред нас нè водеа кон истата цел, како што рече таа, држава чија безбедност и стабилност е гарантирана однатре, но и од нашите сојузници.
„Како министерка за одбрана чувствувам голема чест и одговорност што ја предводам одбраната во овие времиња кога соработката и колективната одбрана се поважни од кога било. Нашата интеграција во НАТО не е само потврда за нашата посветеност кон мирот и стабилноста, туку и сведоштво за нашата подготвеност да придонесуваме кон глобалната безбедност“,
рече таа.
Со сојузните, според министерката за одбрана, имаме иста цел, мисија и делиме исти вредности, а тоа се, како што вели, безбедност, стабилност, мир, солидарност и меѓусебна поддршка.
„Заедно, ние сме посилни и подобро подготвени да се соочиме со предизвиците што нè очекуваат. Само преку колективната одбрана и соработка можеме да градиме постојан и траен мир. Нека ни е честит денот на сојузничкото единство, нека ни е честит Денот на НАТО!“
рече Петровска во видеопораката.