(ВИДЕО) Нов протест за „Монструм“ – блокирани неколку улици во Скопје

Ова не се први протести што ги организираат роднините на осудените. Тие протестираа и по завршните зборови на обвинителството во кои Фатиме Фетаи остана на обвинението за тероризам и побара најстроги казни

Почна протестот за случајот „Монструм“ откако пред три дена судот изрече три доживотни казни затвор, две затворски казни од 9 и 15 години и една ослободителна пресуда за случајот со петкратното убиство кај Смилковско Езеро.

Протестот започна од паркот во Чаир, а ќе продолжи кон Основниот кривичен суд, од каде што демонстрантите ќе маршираат кон Собранието, а ќе заврши пред Владата.

Од МВР најавија дека од 13 часот за сообраќај ќе бидат затворени улиците „Христијан Тодоровски-Карпош“, „Џон Кенеди“, „Цветан Димов“, „Крсте Мисирков“, „Гоце Делчев“, „11 Октомври“, „Васил Главинов“, ВМРО, „Илинденска“, како и околните сообраќајници.

Протестите ги најавија роднините на првостепено осудените кои се жалат дека тие се невини и осудени без докази.

Со првостепената пресуда која Основниот кривичен суд во Скопје ја изрече во вторникот (23 февруари) на доживотен затвор за тероризам беа осудени Алил Демири, Африм и Агим Исмаиловиќ, Хаки Азири на 9, а Фејзи Азири на 15 години за помагање. Сами Љута доби ослободителна пресуда откако обвинителството се откажа од негово гонење поради немање докази за вмешаност во петкратното убиство.

„Монструм“: Три доживотни казни затвор, една од 15, една од 9 години и една ослободителна – се работи за монструозно, садистичко убиство, рече судијата Ставрев

Ова не се први протести што ги организираат роднините на осудените. Тие протестираа и по завршните зборови на обвинителството во кои Фатиме Фетаи остана на обвинението за тероризам и побара најстроги казни.

Се најавуваат нови протести за „Монструм“, одбраната тврди дека пресудата е донесена без докази

Случајот во јавноста познат како „Монструм“ се однесува на петкратното убиство кај Смилковско Езеро на 12 април 2012 година. На самото место беа убиени четири момчиња од македонска националност на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Трпковски и 45-годишниот Борче Стевковски од селото Црешево.

Ова е втора пресуда од Кривичниот суд откако претходно Врховниот суд ја укина првата и го врати предметот на повторно судење. Во првиот судски процес сите шест лица беа осудени на доживотен затвор за кривичното дело тероризам.

Досега 14 лица од протестот за „Монструм“ се повикани во полиција: Кривични и за непочитување на мерките и за инцидентите