Концесијата за експлоатација на минерални суровини во Средно Коњари е со важност до 2041 година. По претставка на жителите, Министерството за економија испратило инспектори да проверат дали на терен се работи во согласност со дозволата. Надлежните немаат забелешки за работењето на концесионерот
Нов протест на жителите на Средно Коњари. По првите звуци од камионите утрово, локалното население меѓусебно си дојавило дека концесионерот продолжува со експлоатација на песок и веднаш излегло да му го попречат работењето. Откако се собрала поголема група демонстранти, камионџиите запреле со работа и ги повлекле камионите од терен. Вака ќе биде додека ископот не запре целосно, велат жителите.
„Колку пати треба јавно да предупредиме дека копаат во ризични зони, ни ја уништуваат природата, ќе ни дојдат до темелите на куќите, верувајте. Уништија првокласна земја. Се приклучи цело село на протест и запреа со работа, но ние во знак на протест го блокираме и регионалниот пат кон Свети Николе. Не отстапуваме, цело село е против ова самоволие. Уште чекаме да дојде министерот Бектеши да види со што се соочуваме, да ни каже во очи дали е ова законски. Целата Влада вети поддршка и веќе не се јави. Не живееме во Албанија, во Косово да бараме помош од надвор, живееме во Република Северна Македонија и заслужуваме да ни се слушне гласот. Не сме странци“,
вели за „360 степени“ Халим Алими, жител на Средно Коњари.
Ова е втор протест откако е прогласена вонредна состојба.
Жителите на Средно Коњари, со поддршка од жителите од останатите околни села, со години бараат да запре ископот на песок во селото.
Во Средно Коњари ископот е во нива, каде што песокот се смета за минерална суровина, па концесијата за експлоатација е во надлежност на Министерството за економија. Жителите во јануари годинава поднесоа претставка до ресорното министерство со очекување Државниот технички инспекторат да го санкционира концесионерот. Од Министерството за економија за „360 степени“ кажаа дека инспекторите не утврдиле пропусти во работењето на концесионерот.
Управителот на фирмата „Еуро прогрес”, која ја има концесијата, е Ќазим Османовиќ, кој долго е во бизнисот. Ископот во Средно Коњари го почнале во 2009 г., а концесијата е со важност до 2041 година. Тој по секое обвинување на жителите тврдеше дека во денешно време ниту дете не може да поткупите да молчи, ако се работи незаконски, и најави дека ќе бара институционална заштита од соселаните.
Демонстрантите, пак, порачуваат дека ако не се спречи ископот, протестите ќе се префрлат пред владината зграда.
Фирма поврзана со Османовиќ, освен во Средно Коњари, копаше и во соседното населено место Горно Коњари, директно од реката Пчиња, за чиј надзор надлежен е Државниот инспекторат за животна средина. Таму, дозволата е истечена, а Инспекторатот утврди серија пропусти во работењето на фирмите на терен, како и на акционерското друштво „Водостопанство“, кое е задолжено за уредување на речните корита.