По прозивките на жителите на скопско Средно Коњари, кои долг период бараат да прекине ископот на песок во селото, од Министерството за економија велат дека инспекторатите биле на терен, но не утврдиле никакви недостатоци во процесот.
„За издадените дозволи за ископ на песок и чакал во близината на с. Средно Коњари, Министерството за економија побара од Државниот инспекторат за техничка инспекција, од Државниот инспекторат за животна средина и од Државниот инспекторат за земјоделство да извршат увид на локалитетот и за констатираното да го информираат Министерството за економија. Инспекторатите не констатираа недостатоци при вршењето на експлоатацијата“,
велат за „360 степени“ од Министерството за економија.
Во Средно Коњари ископот е во нива, каде што песокот се смета за минерална суровина, па концесијата за експлоатација е во надлежност на Министерството за економија. Жителите во јануари годинава поднесоа претставка до ресорното министерство со очекување Државниот технички инспекторат да го санкционира концесионерот. Дополнително, при секој обид за ископ жителите сплотено ги бркаат камионџиите.
Последниот протест се одржа пред десет дена и тие велат дека нема да престанат со отпорот оти дозволата се злоупотребувала, концесионерот со ископот стигнал до подземните води и се плашат дека може да се загади и водата за пиење.
Дополнително, реагираат што ископот се врши блиску до куќите, а обвинуваат дека се уништува плодно земјиште и дека министерот за економија Крешник Бектеши свесно им прогледува низ прсти на концесионерите.
Од Министерството за економија велат дека до Владата ќе достават предлог-решение за раскин на договорите за концесија во случај кога се нарушени јавниот ред, безбедноста или здравјето на граѓаните.
Концесијата за експлоатација на минерални суровини во Средно Коњари ја доби фирмата „Еуро прогрес“, чиј сопственик е Ријад Османовиќ, а управител е Ќазим Османовиќ. Ископот го почнале во 2009 г., а концесијата им е со важност до 2041 година.
Управителот Ќазим Османовиќ за „360 степени“ претходно кажа дека во денешно време ниту дете не може да поткупите да молчи, ако се работи незаконски, а посочи дека ако продолжат протестите ќе бара и заштита од институциите оти трпи загуби.
Друга фирма, „Прогрес компани“, каде што Ќазим Османовиќ фигурира како сопственик, вршеше уредување на речното корито на Пчиња, во соседното село Горно Коњари, а по дозвола на АД „Водостопанство“. Таму, дозволата истече во декември, а Инспекторатот за животна средина најде серија пропусти во ископот и покрена прекршочна постапка против носителот на дозволата АД „Водостопанство“.