Азизи стана пратеник на местото на тетовскиот градоначалник Билал Касами, чиј мандат на негово барање не беше верификуван на конститутивната седница, а Салиу-Фетаи доби пратенички мандат по прегласување на неколку избирачки места минатиот месец во шестата изборна единица
Собранието денеска го усвои извештајот на Верификациската комисија и со тоа ги верификува мандатите на пратениците Аднан Азизи и Имрлије Салиу-Фетаи од коалицијата „Вреди“. Претходно Верификациската комисија на седница усвои извештај дека нема основа за оспорување на верификацијата на нивните мандати.
Азизи стана пратеник на местото на тетовскиот градоначалник Билал Касами, чиј мандат на негово барање не беше верификуван на конститутивната седница, а Салиу-Фетаи доби пратенички мандат по прегласување на неколку избирачки места минатиот месец во шестата изборна единица.
Пратениците ја усвоија и одлуката за избор на претседатели, заменик-претседатели, членови и нивни заменици на Комисијата за политички систем и односи меѓу заедниците и на Законодавно правната комисија.
Александар Велјановски е претседател на Комисијата за политички систем, а Љупчо Пренџов на Законодавно-правната комисија.
Со 101 глас „за“ од вкупно 117 присутни, на 28 мај во Собранието ги верификуваше мандатите на 118 пратеници во новиот парламентарен состав.
Се верификувањето на овој парламентарен состав, им престана мандатот на пратениците од стариот собраниски состав, на новите пратеници што се носители на други функции, а на шест пратеници им прекинува функцијата во Владата и поради тоа таа ќе ги извршува само техничките функции до изборот на новата влада.
Претседателот на Движењето Беса и градоначалник на Тетово, Билал Касами, беше кандидат за пратеник од коалицијата „Вреди“ и носител на пратеничката листа во шестата изборна единица. До Собранието достави изјава дека се откажува од пратеничкиот мандат и бара да не му биде верифициран.
„Јас, Билал Касами, како избран кандидат за пратеник во шестата изборна единица на парламентарните избори 2024, при чиста совест и здрав разум, неприсилен од никого, под целосна морална, материјална и кривична одговорност, изјавувам дека се откажувам од пратеничкиот мандат и барам да не ми се верифицира мандатот од страна на Собранието на Република Северна Македонија“,
стои во изјавата на Касами потпишана со датум 23 мај 2024 година.
Коалицијата „Вреди“ во шестата изборна единица има освоено осум пратенички мандати, а Азизи на местото на Касами во собраниските клупи доаѓа како деветти на листата во оваа изборна единица.
Коалицијата „Вреди“ доби еден пратеник повеќе за сметка на пратеник на „Европскиот фронт“ со прегласувањето во шестата изборна единица на 22 мај.