Се претпоставува дека во Врање, Ниш, Белград и во Сремски Карловци се вакцинирани над 20 илјади македонски државјани, кои со ваквиот однос на властите се соочуваат со проблем да докажат дека се вакцинирани, иако министерот Филипче уште во март вети дека со српскиот колега Лончар ќе ги договори сите детали
Граѓаните што двете дози на вакцина ги примиле во Србија треба да си извадат сертификат за вакцинација оттаму.
Ваков одговор добивме од македонското Министерство за здравство, откако наши граѓани реагираа дека по примена втора доза на вакцина во Србија не можат да добијат сертификат – во Србија добиле одговор дека сертификат треба да си извадат во Северна Македонија, а тука матичните лекари одговориле дека немаат такви насоки.
Во одговорот што го добивме од нашето Министерство за здравство, оттаму појаснуваат дека во земјава ќе издаваат сертификат на граѓаните кои со прва доза се вакцинирале во Србија, а се ревакцинирале тука.
„Граѓаните кои примиле вакцина и ревакцина во Република Србија или друга земја, сертификат дека примиле две дози вакцина треба да извадат од земјата каде што се вакцинирале. Граѓаните кои примиле прва доза вакцина во Република Србија, а втора доза ревакцина сакаат да примат во Македонија, за тие граѓани ќе се издава сертификат во нашата држава. Во тек е усогласување на содржината на меморандумот помеѓу нашата земја и Република Србија со кој ќе биде регулирано тоа прашање“,
велат од Министерство за здравство.
Со уште посепецифичен проблем се соочуваат лицата што во Србија се вакцинираа со „Астра Зенека“. Македонските здравствени власти сѐ уште го немаат променето ставот во однос на оваа вакцина и таа кај нас може да ја примат само оние што се на возраст под 60 години и покрај фактот што државите на кои се реферираа, како Канада и Германија, ја дозволија употребата на оваа вакцина и за лицата на возраст над 30 години.
Нема став ниту за можноста ревакцинацијата на овие лица да се изврши во С Македонија, но со вакцината на „Фајзер“, која според повеќето искуства од европските држави се препорачува како замена за „Астра Зенека“.
Се претпоставува дека во Врање, Ниш, Белград и во Сремски Карловци се вакцинирани над 20 илјади македонски државјани, кои со ваквиот однос на властите се соочуваат со проблем да докажат дека се вакцинирани, иако министерот Филипче уште во март вети дека со српскиот колега Лончар ќе ги договори сите детали, па дури и ја најави можноста доколку тоа не се случи да им се овозможи на лицата самите да се пријават за ревакцина на официјалната македонската веб-страница за вакцинација.
„Да видиме дали може да ги добиеме податоците електронски за да ги вградиме во нашиот систем. Доколку не, ние веќе попладнево разговаравме да направиме еден модул на сегашниот интернет-страница ‘Вакцинација’ за тие граѓани да можат да се пријават. Граѓаните секако добиле термин за ревакцина, доколку некој не може да оди во Србија, доколку некој што сака овде да продолжи, ние тоа ќе го испланираме во нашиот систем“,
изјави Филипче своето гостување на ТВ Сител.
Таква опција на интернет-страницата не постои, иако периодот за ревакцинација се приближува, бидејќи најголем дел од македонските државјани, организирано или приватно, ја искористија можноста што ја дозволија српските власти, а не беше забранета од домашните и во последниот викенд од март се вакцинираа во Србија. Втората доза од вакцината, со оглед дека најголем процент примиле „Астра Зенека“, тие треба да ја добијат во втората половина на идниот месец.
„360 степени“ се обрати и до српското Министерство за здравство со прашања колку македонски граѓани досега се вакцинирале и ревакцинирале во Србија, дали испратиле таков список до македонските власти и како тие граѓани можат да добијат потврда за примена вакцина. Меѓутоа, до моментот на објавување на овој текст, не добивме одговор.
Во меѓувреме, македонските власти подготвуваат дигитални сертификати, односно т.н. „зелен пасош“, за кој министерот за здравство Венко Филипче минатата недела зборуваше во неколку наврати.
Апликацијата преку која ќе бидат достапни дигиталните ковид-пропусници сè уште не е готова, односно, како што велат од Министерството за здравство во денешниот одговор, „зелениот пасош е во процес на проверка и адаптација се очекува во најбрз период да почне да функционира“.
Во последната изјава околу дигиталните ковид-пропусници, министерот Филипче најави дека тие ќе бидат достапни и за граѓаните што се вакцинираат во Србија, но само доколку на потврдата издадена од Србија или од друга земја има кју-ар код кој ќе може да се скенира.