Според одлуката, лице кое три години пред избори е осудено на затворска казна не може да се кандидира за пратеник. Со тоа, не само што е оспорен мандатот на пратеник кој го дал одлучувачкиот глас за избор на кабинетот на Хоти, туку и на лидерот на Самоопределување му е оневозможено да се кандидира за пратеник, затоа што во септември 2018 г. бил правосилно осуден на условна затворска казна
Уставниот суд на Косово ја објави денеска коечната пресуда, со која досегашната Влада, предводена од Авдулах Хоти од Демократскиот сојуз на Косово (ЛДК), се прогласува за нелегитимна и се наложува одржување вонредни парламентарни избори, јави МИА од Приштина.
Судот на 21 декември пресуди, а денеска го објави и образложението, во полза на опозициското движење Самоопределување, кое го оспори правото на глас на еден од пратениците во Собранието кои гласаа за избор на кабинетот на Хоти, поради тоа што бил правосилно осуден поради кривично дело.
Во пресудата на Уставниот суд се нагласува дека нема право да се кандидира за пратеник лице кое три години пред одржувањето на изборите било казнето со првосилна пресуда со затвор во траење од повеќе од една година.
Според дел од косовските медиуми, освен што се урива Владата на Хоти, денешната одлука е на штета и на самото движење Самоопределување, затоа што, како што велат некои од правните експерти, со неа му се забранува и на лидерот Албин Курти и на неколку видни членови на таа партија да се кандидираат за пратеници на наредните парламентарни избори, кои треба да се одржат во наредните месеци.
Курти и неколку негови блиски соработници беа осудени на условни казни од над една година затвор, кои подоцна, со одлука од септември 2018 година, станаа правосилни. Лидерот и тројца тогашни пратеници на Самоопределување беа осудени поради „користење оружје или опасни средства“ (по фрлањето солзавец за време на собраниските седници) и „попречување на службено лице во вршењето на должноста“ на демонстрациите во Приштина.
Поранешниот претседател на Уставниот суд на Косово, Енвер Хасани, за порталот „Газета Експрес“ изјави дека, очекувано, според денешната конечна пресуда, Курти нема право да се кандидира за пратеник пред да истече рокот од три години од пресудата против него, односно до септември оваа година.
„Пресудата е таква каква што се очекуваше дека ќе биде. Ништо ново. Значи дека Албин Курти не може да се кандидира за пратеник, а истото важи и за секој друг кој е казнет правосилно“,
изјави Хасани.
Во изјава за медиумите на групацијата „Коха“, со сличен став излезе и правниот експерт Ехат Мифтарај, кој вели дека со денешната објава на Уставниот суд само се потврди пресудата од 21 декември.
„Со оваа пресуда, Уставниот суд го потврди тоа што беше кажано во првата одлука, а тоа е дека сите осудени во последните три години со правосилни одлуки нема да може да се кандидираат за пратеници, вклучително и Курти“,
вели Мифтарај.
Од партијата на претходниот косовски премиер Курти засега нема официјална реакција на одлуката на Уставниот суд.
Адвокатот Том Гаши, кој е член и правен застапник на Самоопределување, кратко изјави дека не е точно оти Курти нема право да учествува на наредните избори.
Членката на партиското раководство Тинка Курти, преку нејзиниот Фејсбук-профил, порача дека „нема таков заговор кој ќе ја спречи народната волја за победа на Самоопределување“.
Самоопределување му го оспори правото да биде пратеник на Етем Азири, претставник на партиите на немнозинските етнички заедници, а со тоа и правото на глас за избор на новата влада.
Уставниот суд одлучи дека Азири немал право да гласа, а со оглед на тоа што неговиот глас беше одлучувачки за избор на новата косовска Влада, со поништувањето на тој глас, кабинетот на Хоти го изгуби легитимитетот.
Со конечната одлука на Уставниот суд се наложува оргнизирање вонредни парламентарни избори, кои треба да се одржат најдоцна 40 дена по нивното прогласување, по договор на в.д. претседателката на државата Вјоса Османи со параментарните партии.