За усвојување на дневниот ред на денешната седница собраниска седница, со која почна постапката за уставни измени, не гласаа пратеникот на СДСМ, Диме Велковски, и неговиот колега и коалициски партнер Илија Николовски, претседател на Партијата на пензионерите. Како што рече премиерот Ковачевски на прес-конференцијата по завшувањето на седницата, Николовски имал проблеми со притискањето на копчето од системот за гласање, а Велковски не бил присутен на седницата и неговото отсуство било најавено, што, како што рече премиерот, не значи дека нема да биде присутен на наредните седници
За дневниот ред денеска не гласаше и пратеникот од Движењето Беса, Фадил Зендели, иако сите партии и нивни пратеници од албанскиот блок најавија дека ќе ги поддржат уставните измени
Премиерот Димитар Ковачевски, одговарајќи на новинарски прашања на денешната прес-конфренција, изјави дека во СДСМ, чиј претседател е, и во коалицијата што ја предводи има апсолутно единство во однос на поддршката и гласањето за уставните измени.
Прашањето за единството во коалицијата се наметна откако нејзини двајца пратеници не гласаа за утврдување на дневниот ред на денешната седница со која почна пленарната собраниска постапка за уставни измени.
Како што може да се види од листата на гласање објавена на интернет-страницата на Собранието, за дневниот ред не се изјасниле пратеникот на СДСМ, Диме Велковски, и неговиот колега и коалициски партнер Илија Николовски, претседател на Партијата на пензионерите. Тие не гласале ниту „за“, ниту „против“, нути „воздржано“.
Гласањето за дневниот ред на денешната седница беше еден вид лакмус за бројот на пратеници кои поддржуваат уставни измени. Дневниот ред беше усвоен со 70 гласа „за“ и 47 „против“ и ниту еден „воздржан“. Ова беше поздравено од пратениците на ВМРО-ДПМНЕ, бидејќи, според нив, е јасен идикатор дека власта го нема потребното мнозинство за излгасување на уставните измени со кои Бугарите и делови од уште пет народи треба да влезат во Преамбулата на највискиот правен акт во државата.
На прес-конференцијата што премиерот Ковачевски ја одржа во Владата по заршувањето на седницата во Собранието, тој беше прашан – дали негласањето на двајцата пратеници значи дека во СДСМ и коалцијата што ја предводи нема единство за уставните измени. Новинарката го потсети премиерот дека Велковски, случајно или не, не гласаше ниту за заклучоците за т.н. француски предлог, лани во јули.
Ковачевски одговори:
„Во нашата партија и коалција има апсолутно единство во однос на гласање на уставните измени. Пратеникот Илија Николовски, инаку претсдател на Партијата на пензионерите, имаше проблем со пристискањето на соодветното копче на системот за гласање, меѓутоа за да не бара поединечно изјаснување беше оставено со 70 гласа да биде изгласан дневниот ред. Инаку, тој постојано беше со коалицијата. Пратеникот Диме Велковски денеска не беше, беше најавено неговото отсуство и не беше присутен во Собранието, што не значи дека нема да биде присутен на наредните седници“.
Ковачевски беше прашан и дали е точно дека еден пратеник од СДСМ, кој денеска не беше присутен на седницата, планира да поднесе оставка и да не гласа за уставните измени во иднина.
„Нема таква информација дека пратеник сака да поднесе оставка“,
рече премиерот Ковачевски.
Инаку, за дневниот ред денеска не гласаше и пратеникот од Движењето Беса, Фадил Зендели, иако сите партии и нивни пратеници од албанскиот блок најавија дека ќе ги поддржат уставните измени.
Зошто не гласаше, Зендели не се произнесе, иако беше дел од пратениците што земаа збор на седницата. Ставот на Зендели може да се насети од неговиот говор. Во него тој се осврна на прашањето зошто толку време и требало на Владата за да го достави предлогот за уставни измени до Собранието, притоа заклучувајќи дека единственото можно образложение е намерата со тоа да купи време и да се задржи на власт до крајот на мандатот, притоа занемарувајќи ја европската агенда.
„Вие често се повикувате на европската агенда, но од друга страна станува збор за политички калкулации и за купување време и вашиот мандат да се одолговлекува до крај“,
рече Зендели.
Говорејќи за интервенцијата во Преамбулата на Уставот, Зендели рече дека таа досега била толку пати менувана, што почнала да го губи значењето.
„Има и едно друго прашање кое јас како Албанец и пратеник сакам да го поставам, овој начин на интервенција во Преамбулата, на некој начин, го става во не добра положба албанскиот народ. Позиција која не е во согласноста со тоа што се Албанците“,
рече Зендели.
Ова тој го аргументиташе со барањето за промена на формулацијата „20 проценти“ во „албански јазик“, што дел од партиите од албанскиот политички блок, претежно од опозицијата, но и владејачката Алијанса за Албанците го бараат изминатиов период.
„За нас Албанците ова (ваквата формулација) е неприфатлива. За ова прашање треба да се најде решение и не бегаме од ваквата одговорност“,
рече Зендели.
По усвојувањето на дневниот ред и дискусијата која траеше околу два и пол часа, претседателот на Собранието, Талат Џафери, ја прекина седницата, соопштувајќи дека за нејзиното продолжение, на кое треба да се гласа за пристапување кон измена на Уставот и за што е потребно двотретинско мнозинство, ќе извести дополнително.
Ова наиде на негодување кај пратениците на опозициската ВМРО-ДПМНЕ, кои на прес-конференција по завршувањето на седницата, порачаа дека уставни измени под бугарски диктат нема да има и побараа предвремени избори.
Премиерот Димитар Ковачевски, придружуван од сите министри, на прес-конференцијата во владиниот прес-центар, рече дека денешниот ден донел два заклучока. Првиот е дека процесот за уставни измени е започнат со изгласнување на дневниот ред, а вториот и многу поважен е дека денеска станало кристално јасно кој сака Северна Македонија да стане просперитетна држава, а кој сака да ја блокира европската иднина на земјата. Тој порача дека нема да потклекнат пред блокадата на ВМРО-ДПМНЕ и дека ќе продолжат до обезбедување двотретинско мнозинство.