Тупанчески рече дека соодветно ќе се постапува и доколку се утврди каква било одговорност од страна на припадниците на КПД „Идризово“ и во однос на другите сите субјекти коишто се инволвирани во случајот
Според министерот за правда Никола Тупанчески, апсолутно треба да се постапува по однос на неодамнешниот инцидент кога Бојан Јовановски – Боки 13 беше претепан од неколку затвореници во затворот „Идризово“ каде што тој ја издржува затворската казна.
„Значи, апсолутно треба да се постапи во однос на настаните што пред некој ден се случија во ‘Идризово’. Верувам дека ќе имаме завршница и доколку има елементи за кривично дело ќе постапи Јавното обвинителство“,
одговори Тупанчески на новинарско прашање денеска на маргините на конференцијата по повод Европскиот ден на правдата и одбележување на две години од кампањата за подигање на свеста за бесплатна правна помош.
Тупанчески додаде дека соодветно ќе се постапува и доколку се утврди каква било одговорност од страна на припадниците на КПД „Идризово“, и во однос на другите сите субјекти што се инволвирани во случајот.
„Дали ќе биде дисциплинска, кривична, да го оставиме тоа на органите коишто се надлежни и за постапување“,
истакна министерот.
Бојан Јовановски познат како Боки 13 на 20 октомври бил претепан од тројца затвореници во затворот „Идризово“ каде што ја издржува затворската казна во случајот „Рекет“.
Од МВР информираа дека на 20 октомври во 20 часот во СВР Скопје – Полициската станица Гази Баба, од Комплексот клиники „Мајка Тереза“ било пријавено дека кај нив со повреди бил донесен Б.Ј. (36) од Скопје.
Адвокатот на Јовановски, Сашко Дукоски, тогаш изјави дека неговиот клиент бил нападнат со клоци и тупаници без никаква причина од тројцата затвореници додека седел на клупа во дворот на „Идризово“. Одговорноста ја лоцира ја директорот на Управата за извршување санкции, Марјан Спасовски.
По инцидентот во кој беше претепан Јовановски, Министерството за правда најави дека службеници од Управата за извршување санкции ќе извршат вонреден надзор на затворот „Идризово“.