Судијата Пајазити веќе неколку години е заменик-претседател на Кривичниот суд, а неговото име се споменуваше кога тој беше судија за извршување санкции и го изготвуваше упатниот акт за експремиерот Груевски, додека судијката Крстиќ е една од судијките во предметот „Машинопромет“ против Мирослав Шиповиќ, а била и дел од Кривичниот совет кој го му го смени притворот со куќен притвор на ексначалникот Горан Грујевски во предметот „Тврдина“
Заменик-претседателот на Кривичниот суд Скопје, Пајазит Пајазити и Сандра Крстиќ се судиите на претходна постапка кои одредија мерки на претпазливост за осомничените за упадот во М-НАВ, објави ТВ Телма.
Според одлуката, како што беше наведено од Судот, осомничените добиле забрана за напуштање на живеалиштето односно престојувалиштето, обврска за нивно јавување на определено службено лице во судот, а одземени им се и патните исправи односно има забрана за нивно издавање. Меѓу мерките за претпазливост кои им се изречени е и забрана за комуникација со оштетениот, како и меѓусебна комуникација, но објаснување зошто е одбиен предлогот на Обвинителството за притвор засега нема.
Судијата Пајазити веќе неколку години е заменик-претседател на Кривичниот суд, а неговото име, како што пренесуваат дел од медиумите, се споменуваше кога тој беше судија за извршување на санкции и го изготвуваше упатниот акт за експремиерот Груевски.
Судијката Крстиќ, како што пренесе Телма, е една од судијките во предметот „Машинопромет“ против Мирослав Шиповиќ, експретседавач на Советот во Општина Центар, а медиумите пишуваа дека била и дел од Кривичниот совет кој го му го смени притворот со куќен притвор за ексначалникот Горан Грујевски во предметот „Тврдина“ на СЈО.
Против одлука на судиите на претходна постапка, како што наведоа денеска од Јавното обвинителство, ќе биде поднесена жалба затоа што беше одбиен предлогот за определување мерка притвор за четворица осомничени за кривично дело загрозување на безбедноста на воздушниот сообраќај.
Упадот во Македонската навигација се случи пред два дена, непосредно по прес-конференцијата на лидерот на Струковиот синдикат на контролорите на летање, Александар Тасевски, на која тој информира дека членовите на Синдикатот се под засилен притисок од менаџментот на М-НАВ поради негодувањата на синдикалците за последниот оглас за вработување.
Меѓу осомничените за насилството е и поранешниот министер и актуелниот претседател на партискиот огранок на ДУИ во Чаир и вработен во Македонска навигација , Беким Незири. Од ДУИ се оградија дека инцидентот неправедно и се припишува на партијата, а претседателот на Управниот одбор и извршен директор на Македонската навигација, Фахрудин Хамиди, го опиша упадот во институцијата како „кошкање меѓу колеги“ кое го имало во секоја фирма.
Владата најави дека на наредната седница ќе биде предложена и донесена одлука за разрешување на целото раководство, како и на сите членови на Управниот одбор на М-НАВ.