Тој посочи дека досега се направени две работи – возачите да се третираат како професионалци во новата визна стратегија на шенген-зоната, а не како туристи и постигнати се директни договори со поединечни земји од шенген-зоната за издавање долгорочни визи за превозниците
Ние можеме да организираме и одржуваме одлични конференции, да си муабетиме, но ако потоа останеме затворени, беспредметен е секој разговор, изјави денеска вицепремиерот и министер за транспорт Александар Николоски осврнувајќи се на проблемот со кој се соочуваат домашните превозници при влез и престој во шенген-зоната.
Говорејќи на панел-дискусијата во рамките на „Форумот за глобална трговија и раст 2026” во организација на Швајцарската комора на Македонија, Николоски посочи дека македонските професионални возачи сè уште се третираат како туристи, со што подлежат на правилото за ограничен престој од најмногу 90 дена во период од 180 дена.
„Се обидувавме да најдеме заедничко решение како земја од Западен Балкан заедно со шенген-зоната, но, за жал, нема финално решение од страна на ЕУ. Би рекол дека изостанува организиран пристап“,
истакна Николоски.
Тој посочи дека досега се направени две работи – возачите да се третираат како професионалци во новата визна стратегија на шенген-зоната, а не како туристи и постигнати се директни договори со поединечни земји од шенген-зоната за издавање долгорочни визи за превозниците.
Николоски упати благодарност до Швајцарија, која прва започнала да го применува овој модел.
„Швајцарија тука беше прва, за што се заблагодарувам. Почна да издава вакви работни визи за возачите и се надевам дека тоа ќе биде пример што ќе го следат и другите земји членки на шенген-зоната“,
додаде тој.
Вицепремиерот во овој контекст се осврна и на конкурентноста велејќи оти е многу поевтино стоката што се произведува тука да биде извезена до крајната дестинација од домашен превозник.
„Колку е поскапо странски превозник да дојде, да ја земе, па да ја однесе таму каде што треба. Ова е навистина голем, голем предизвик за ние да зборуваме за проширување на граничните премини“,
додаде Николоски.
Министерот Николоски на почетокот на овој месец информира дека сите можни чекори за склучување билатерални договори со земјите членки на шенген-зоната, со цел олеснување на движењето и работењето на македонските професионални возачи низ европските транспортни коридори.
Тој рече дела со Хрватска веќе е склучен билатерален договор, а таков договор потврдила и Швајцарија.
Со Романија, како што рече, постигнато е решение со кое на македонските возачи ќе им се издаваат дозволи наместо визи, а најави дека со Бугарија и со Грција во тек се разговори за возачите кои остваруваат влез и излез во истиот ден да не подлежат на регистрација.
Професионалните возачи и транспортери од земјава, организирани од транспортната асоцијација „Макам-транс“, на 31 август одржаа протест пред седиштето на Делегацијата на Европската Унија (ЕУ) во Скопје, каде што беа паркирани и околу дваесетина камиони.
Како најголем проблем го посочија начинот на кој им се пресметува престојот во странство, односно тоа што деновите им се бројат како да престојуваат во земјите како туристи.