Лидерот на СДСМ, Зоран Заев, кој вчера стана мандатар, има рок од 20 дена да се обиде да обезбеди мнозинство, односно да достави до Собранието предлог-состав и програма за работа на нова влада.
Течат роковите од 20 дена за формирање влада, откако шефот на државата Стево Пендаровски вчера му го довери мандатот на лидерот на СДСМ и коалицијата „Можеме“, Зоран Заев, која на предвремените парламентарни избори на 15 јули освои најмногу мандати.
Лидерот на СДСМ, Заев, во изјавата по добивањето на мандатот за составување нова влада рече дека најверојатно, пред да помине законскиот рок од 20 дена, земјава ќе добие ефикасна влада, која ќе го продолжи вистинскиот пат – кон ЕУ, ќе го развива концептот „едно општество за сите“, ослободена од какви било национализми и етнички предрасуди, а приоритет ќе бидат економијата, борбата со криминалот и корупцијата, како и прочистувањето на правосудството.
Прашан што ќе се случи ако за 20 дена не успее да состави влада, дали ќе го врати мандатот и дали ќе има нови избори, Заев истакна дека тоа прашање е регулирано со Уставот, посочувајќи на ситуацијата со составувањето влада во 2016 година.
„Имавме ситуација во 2016, мандатот му беше доверен на Никола Груесвки и не успеа за 20 дена да формира влада. Уставот е јасен дека рокот истекува и мандатот се враќа. Тогаш мандатот го добив јас и второрангираната коалиција со два пратеника помалку од коалицијата предводена од ВМРО-ДПМНЕ. Јас успеав да формирам влада. Разликата е во тоа што сега јас ќе успеам да формирам Влада“,
истакна Заев.
Лидерот на ДУИ, Али Ахмети, во брифингот за новинарите откако лидерите на другите партии на Албанците не дојдоа на средбата во скопскиот хотел Парк, која тој ја свика на годишнината од потпишувањето на Охридскиот рамковен договор, кажа дека сè уште немаат договор со досегашниот коалициски партнер СДСМ и ги повтори црвите линии – Охридскиот договор, Преспанскиот договор и Договорот за добрососедство, ветинг и премиерската позиција.
Заев и Ахмети се сретнаа вчера по доделувањето на мандатот на лидерот на СДСМ, а по средбата излегоа со заедничко соопштение дека постигнати се основи за напредок кој води до коалиционен договор за влада.
Лидерот на ВМРО-ДПМНЕ, Христијан Мицкоски, пак, ја оспори одлуката на претседателот Пендаровски да му го додели мандатот на Заев, без тој да му приложи доказ дека обезбедил мнозинство, оценувајќи дека со тоа го прекршил Уставот, и оти со доверувањето на мандатот, му овозможил уште 20 дена преговарање на Заев за влада. Тој со дел од партиската пратеничка група попладнето побара средба кај претседателот на државата во вила Водно за да им ги соопшти аргументите врз основа на кои го доделил мандатот на Заев, а по средбата Мицкоски соопшти дека ВМРО-ДПМНЕ ги замрзнува односите со Пендаровски, оценувајќи ја неговата одлука како злупотреба на позицијата Претседател на државата.
Претседателот Пендаровски пред да го довери мандатот се обрати кусо и појасни дека врз основа на член 84 и согласно член 90 од Уставот, за мандатар го определува Заев. По средбата со Мицкоски, во вила Водно, пак, изјави дека мандатот му го доверил на Заев, бидејќи смета дека роковите за мандат течат по верификација на мандатите на пратениците иако не е избран претседател на Собранието имајќи ја предвид политичката пракса во изминативе 30 години, односно ситуациите во 2006 и 2016 година.
Според член 90 од Уставот, по добивањето на мандатот, мандатарот во рок од 20 дена на Собранието треба да му поднесе програма и да го предложи составот на Владата. Владата, на предлог на мандатарот и врз основа на програмата, ја избира Собранието со мнозинство гласови од вкупниот број пратеници.