Судот да има предвид дека обвинетиот цело време како премиер и претседател на политичка партија ја користел својата позиција да се скрие неговиот имот и тоа го правеше до крај, до завршувањето на оваа постапка. Сметам дека треба, со оглед дека е во бегство, да му бидат изречени највисоките казни предвидени во законот, рече Стефанова за Груевски
За поранешниот шеф на УБК, Сашо Мијалков, Стефанова побара повисока казна, во рамки на онаа што е предвидена во закон
Конфискација на земјиштето на Водно и во Крушево, на двата стана на улицата „Бихаќска“ во Скопје, како и на трите луксузни апартмани во зградата „Панорама резиденс“, побара обвинителката Лиле Стефанова денеска во завршните зборови во судскиот процес „Плацови на Водно“.
За обвинетите, пак, таа побара различни казни – за некои максимални, за некои минимални.
Експремиерот Никола Груевски, кој е првообвинет и за кого Обвинителството тврди дека е вистинскиот сопственик на имотот и го прикрива, Стефанова побара максимални казни за кривичните дела перење пари и за прекривање на имот.
„При одлучувањето на видот и висината на казната за Груевски, за кој сметам дека во целост се утврдија кривичните дела што му се ставаат на товар, судот да има предвид дека обвинетиот цело време како премиер и претседател на политичка партија ја користел својата позиција да се скрие неговиот имот и тоа го правеше до крај, до завршувањето на оваа постапка. Сметам дека треба, со оглед дека е во бегство, да му бидат изречени највисоките казни предвидени во законот”,
рече обвинителката.
За неговиот братучед и поранешен шеф на УБК, Сашо Мијалков, Стефанова побара повисока казна, во рамки на онаа што е предвидена во закон.
„Обвинетиот Сашо Мијалков негираше дека презел какво било дејствие на извршување на кривичното дело, тврдеше дека сведоците Александар Ивановски и Мето Стојчевски не ја зборуваат вистината, но од сите собрани докази очигледно е дека тој ги презел дејствијата на извршување што му се ставаат на товар и го сторил кривичното дело перење пари, бидејќи знаел дека имотот се купува за Никола Груевски, дека парите се од кривично дело, а сепак ги презел дејствијата на извршување почнувајќи од 2012 завршувајќи до 2020 година. Сашо Мијалков во 2012 година бил носител на висока функција, директор на УБК, а имал и висока функција во ВМРО-ДПМНЕ. Оттаму сметам дека неговата одговорност на прекривање и помагање на Никола Груевски се дејствија кои упатуваат да му биде изречена повисока казна во рамки на казната предвидена со закон”,
побара обвинителката.
За Ристо Новачевски, кој бил поставен за управител на фирмата „Сирах инженеринг“, која е фирма ќерка на офшор компанијата „Сирах лимитед“, обвинителката рече дека е единствениот обвинет кој во јавното обвинителство од самиот старт го опишал начинот, ги признал дејствијата на извршување и уште во самата истрага придонел во откривањето на дејствијата и сторителите на кривичните дела.
„Ристо Новачевски пред судот даде исказ во кој на јасен, недвосмислен и точен начин ги опиша сите дејствија, без разлика дали го товарат или не. Ваквата одважност како јавен обвинител ја ценам како исклучително олеснителна околност во одмерувањето на видот и висината на казната и сметам дека се исполнети условите да му биде определена казна која ќе му биде условена”,
кажа Стефанова.
За Ненад Јоаифовиќ, кој бил сопственик на „Сирах лимитед“, и за Орце Камчев, кој потоа преку своите фирми ја презел сопственоста на земјиштето, пак, таа побара казните да се движат кон минимумот предвиден со законот.
„Во поглед на обвинетите Неанд Јосифовиќ и Јордан Камчев, морам да кажам дека, иако дадени на крајот на оваа постапка, нивните искази ги ценам како олеснителни околности и на судот му предлагам за нив да определи казна во рамките на законски предвидената казна за кривичното дело која по својата висина би се движела кон законскиот минимум”,
рече обвинителката.
Во случајот на обвинителна клупа седеше и мајката на Камчев, Ратка Куновска-Камчева. За неа обвинителката го повлече обвинението бидејќи по прецизирањето на обвинителниот акт, како што рече, ги има предвид одредбите за застареност на нејзиното кривично дело.
Обвинителката претходно во завршните зборови кажа дека смета оти успеала да го докаже обвинението благодарение на материјалните докази, сведоците, но и исказите на самите обвинети.
„Првата работа што се утврди преку доказите е дека обвинетиот Никола Груевски во 2012 година за себе преку фирмата ‘Сирах инженеринг’ си купил недвижен имот лоциран во место викано Шербетница на Водно со точните описи на земјиштето дадени во обвинителниот акт. Ваквата фактичка состојба судот со сигурност ќе ја утврди од изведените вербални докази, од изјавите на обвинетите Ристо Новачевски, Ненад Јосифовиќ и Јордан Камчев, како и од исказите на сведоците Серјожа Марков, Миле Јанакиески, Александар Јанакиески и Мартин Протуѓер. Како се одвивал настанот пред овој суд во целост опишаа и сведоците и обвинетите”,
рече обвинителката.
Неспорно е, зборуваше Стефанова понатаму во завршните зборови, дека најпрво Груевски си формирал фирма и за тоа го искористил обвинетиот Ристо Новачевски, кој бил поставен за управител, а потоа дека ги искористил и фирмата „Сирах лимитед“ и обвинетиот Ненад Јосифовиќ за да преку оваа офшор компанија, а користејќи други фирми исто офшор компании, за да се платат парите наменети за купување на земјиштето.
За парите, рече таа, се поставува прашањето како Груевски нашол над еден милион и 300 илјади евра.
Според неа, Обвинителството успеало да докаже дека експремиерот како претседател на ВМРО-ДПМНЕ од парите кои му се доверени во врска со оваа функција, а кои биле примани и во партијата како донации, присвоил за себе со цел да го купи имотот.
Стефанова во завршниот збор нагласи и дека успеала да го докаже и делото противправно стекнување и прекривање имот кое му се става на товар на Груевски, односно плацовите на Водно за кои биле користени фирмите и офшор компаниите, потоа земјиштето во Крушево каде сакал да гради викендички и летникивци кога ќе се повлече од премиерската функција, како и двата соседни стана на становите во кои живееше на „Бихаќска“, но и трите во „Панорама резиденс“ за кои зборуваше и Камчев дека ги трампил за плацовите на Водно.
За Мијалков, пак, рече дека успеала да докаже оти во целост учествувал во овој процес помагајќи му на Груевски да си купи земјиште, а да не биде изложен.
„Потоа, учествувал во пронаоѓањето на решенија како имотот за кој јавноста дознала дека иако се води на име на фирма, е на Груевски, да биде скриен, односно да го преземе обвинетиот Јордан Камчев, а потоа презел дејствија и учествувал во понатамошното прекривање на овој имот со тоа што барал и добил од сведокот Мето Стојчевски, правно лице преку кое ќе се спроведе договорената размена, односно наместо земјиштето да добие три стана во зградата ‘Панорама резиденс'”,
рече Стефанова.
За овие станови во Панорама Резиденс, кажа обвинителката, додека Мијалков беше во бегство лани, при претрес на неговото возило биле пронајдени и договорите.
Завршните зборови на обвинителката следуваат откако дел од обвинетите во давањето одбрана потврдија дека експремиерот Никола Груевски, кој е првообвинет, ги купил атрактивните парцели.
Бизнисменот Орце Камчев рече дека Груевски за земјиштето на Водно за возврат добил три ексклузивни стана во зградата „Панорама резиденс“ во Скопје.
Обвинетиот Ненад Јосифовиќ, кој се води како сопственик на офшор фирмата „Сирах лимитед“, преку која била отворена фирма-ќерка за купување на плацовите, кажа дека фирмата немала пари на своја сметка во тој момент, а потоа информациите дека ќе пристигнат финансиски средства кои ќе треба да се пренасочат како основачки влог за фирмата во Македонија, добил од Александар Ивановски – Алек Теранова за што била употребена фирмата, тврдеше Јосифовиќ, дознал по објавувањето на „бомбите“.
И обвинетиот Ристо Новачевски, кој кум на Никола Груевски од првиот брак, во својот исказ зборуваше за шемата за купување на плацовите. Кажа дека Груевски од него побарал да биде управител на фирмата ,,Сирах инженеринг”, фирмата ќерка на ,,Сирах лимитед”, како и дека преку неа го купил плацот на Водно. Исто така, кажа дека тој по желба не неговиот кумашин го купил и државното земјиште во Крушево, кое исто така е опфатено со обвинението, Груевски сакал да гради вила таму откако ќе му заврши премиерскиот мандат.
Груевски, кому му се суди во отсуство, по ваквите искази од Будимпешта се огласи на социјалните мрежи велејќи дека бизнисменот Камчев се испазарил и преку ноќ ја сменил изјавата, како и дека Новачевски е под притисок.