Денешниот сведок следуваше по минатонеделниот исказ на бизнисменот Орце Камчев во врска со трите стана што се чуваат за експремиерот. Груевски, пак, кој е првообвинет и му се суди во отсуство, од Будимпешта се огласи на социјалните мрежи велејќи дека бизнисменот се испазарил и преку ноќ ја сменил изјавата
Мето Стојчевски, сопственик на фирма која се занимава со градежништво, денеска се појави во Основниот кривичен суд во Скопје за да сведочи во случајот „Плацови на Водно“, по минатонеделниот исказ на обвинетиот бизнисмен Орце Камчев дека експремиерот Никола Груевски, кој е првообвинет, за земјиштето на Водно за возврат добил три ексклузивни стана во зградата „Панорама резиденс“ во Скопје.
Според неговото сведочење, трите стана (два на поткровје и еден во сутерен) денеска се на име на фирмата „СС инвестмент“, чиј сопственик е тој, но, како што рече, не се чувствува за сопственик и на апартманите. Оваа фирма првично била на негов бизнис-партнер во проектирањето и градењето, а откако завршиле заедничките проекти фирмата продолжила да постои, но немала никаква финансиска активност. Потоа, како што кажа, тој ја презел фирмата.
„Во еден неврзан муабет господинот Сашо Мијалков ме праша дали имам некоја слободна фирма. Го прашав зошто, а тој рече дека не е битно. По еден месец, можеби и повеќе, партнерот излезе од таа фирма, јас влегов во неа и во некој неврзан разговор му спомнав на Мијалков дека имам фирма, му реков ‘ако ти треба, што ти треба, кажи’. Тој рече добро и после пак на некое седнување ми рече ‘може ли да се искористи таа фирма’. Јас прашав за што е, а тој рече дека не е битно. Му реков ‘не може да не е битно. Ако јас стојам зад неа, морам да знам за што е’. Ми рече ‘се работи за некаков имот на Никола Груевски, но не е битно. Ако биде биде, ако не, ништо'”,
рече Стојчевски.
По неколку месеци, кажа тој, за истата тема му се јавил и Камчев, со кого инаку се во роднинска врска, со оглед дека Стојчевски е сопруг на сестрата на Камчев. Според неговото сведочење, Камчев го прашал дали има фирма за да префрли удел на неа од „Панорама“.
За потсетување, Камчев во давањето одбрана минатата недела рече дека било договорено Груевски за возврат на плацовите кои му ги продал да добие три стана во објектот „Панорама резиденс“, но бидејќи не сакал да го крие како сопственик барал тоа да се направи преку фирма која би била партнер во градењето на објектот „Панорама резиденс“, а потоа истата фирма да го отстапи својот удел и да добие три стана. Тие станови, како што кажа Камчев, имаат нереален сопственик – Мето Стојчевски и се чуваат за Груевски.
„Знам дека ги чува Мето Стојчевски и дека ги чува за Никола Груевски. Тоа е она што го знам“,
рече Камчев на минатото рочиште.
Стојчевски денеска Груевски го спомена само како раскажуваше дека Мијалков му барал фирма за да се префрли имот на експремиерот.
„Во 2020 година, кога се заврши ‘Панорама’ како објект и се добија имотни листови, Камчев ми се јави и ми рече дека треба да се купат уделите од ‘Панорама’, ми рече ‘со парите што ќе ги добиеш од уделите ти ќе купиш станови’. Така ‘СС инвестмент’ во 2020 година се стекна со три стана и неколку гаражни места“,
сведочеше денеска Стојчевски.
Клучевите од становите, кажа тој, не се кај него бидејќи не се негови, туку треба да се кај чуварите на објектот.
Одговарајќи на прашањата на адвокатот на Груевски, сведокот кажа и дека експремиерот никогаш не побарал од него лично некаква фирма.
„Рековте дека имотот не е ваш, но се согласувате дека фирмата е ваша?”,
беше едно од прашањата на адвокатот на Груевски понатаму во испрашувањето на кое сведокот одговори со „да“.
Мијалков, пак, претходно на денешното рочиште даваше одбрана и тврдеше дека никогаш ниту помогнал некому да купува имот ниту, пак, дека се крие вистинскиот сопственик. За исказите на другите обвинети, како и за неговиот рече дека судот не мора да им верува бидејќи може некој да каже и некоја невистина за да се спаси. Судот, рече ексшефот на УБК, треба да ја гледа фактичката состојба во целиот судски процес.
„Јас во текот на целата оваа постапка добив едно чувство на набљудувач затоа што видовме куп материјални докази каде што не се сретнав себе, а поминаа и бројни сведоци и ниту еден не ме спомна мене освен Алек Ивановски”,
рече Мијалков.
Груевски, кој е првообвинет и му се суди во отсуство, пак, по минатонеделното сведочење на Камчев за становите, од Бидумпешта се огласи на социјалните мрежи велејќи дека бизнисменот се испазарил и преку ноќ ја сменил изјавата.
„Уште и додал дека земјиштето го платил или трампал со некакви три апартмани во некоја зграда со име ‘Панорама’ или слично на тоа, нешто што никогаш не се случило, ниту пак имам или некогаш сум имал такви апартмани во вкупна големина од 750 квадратни метри кои чекале за примопредавање, со што сам се негира дека ми дал некаква компензација. На прашање дали сум ги презел тие станови, кажал дека не сум ги презел и дека ми ги чувал Мето Стојчевски, кој е зет од сестра на Орце Камчев. Какви лаги!!! Неверојатно!!! Не можам да поверувам!!! Ниту поседувам такви станови, ниту сум ги договорил со некој, ниту некој ми ветил или ми чува станови некаде“,
пишуваше Груевски.