МНР ќе спроведе медиумска кампања за мотивирање за самопопишување на категориите што се сметаат за „отсутни во странство“
Со попишување на дијаспората, на вработените во дипломатско-конзуларните претставништва и нивните семејства, припадниците на армијата во странство, затворениците и бездомниците… денеска почнува првата фаза од пописот на населението, домаќинствата и становите. Оваа активности ќе трае до 21 април, кога завршува пописот, кој официјално ќе почне во земјава на 1 април.
Министерството за надворешни работи ќе спроведе медиумска кампања за мотивирање за самопопишување/саморегистрација на категориите што се сметаат за „отсутни во странство“. Во овие категории спаѓаат лица на работа во ОН и нејзините организации, претставништва или претставници на стопанските комори во странство, деловните единици во странство, воени претставници на армијата во странство и студентите и граѓаните што се ангажирани од страна на Република Северна Македонија врз основа на меѓународна, техничка и друга соработка, како и членовите на нивните семејства/домаќинствата што престојуваат во странство со наведените лица. Овде спаѓаат и сите лица – државјани на Северна Македонија кои по која било основа престојуваат во странство, без оглед на должината на нивниот престој.
Директорот на Државниот завод за статистика Апостол Симовски соопшти дека самопопишувањето ќе се одвива преку веб-апликација, која е лесно достапна и едноставна. Потребно е граѓаните само да се најават со својата електронска адреса. Ќе може да се пристапи само од странство, а безбедноста на личните податоци е осигурана.
Министерството за надворешни работи, како одговорно за дијаспората, преку ДКП, ќе биде вклучено во информирањето на иселениците и другите наши граѓани во странство за да се попишат онлјан преку веб-страницата на ДЗС. ДКП ќе бидат логистичка поддршка. На страницата на МНР веќе има интернет-врска за комуникација со телефонски броеви кои ќе функционираат 24 часа и ќе бидат достапни за граѓаните за информации и појаснувања.
Податоците за нашите државјани во странство што ќе се добијат на пописот ќе бидат можност за планирање на политиките за дијаспората, за услугите што им се потребни на иселениците.
Министерот за надворешни работи Бујар Османи во саботата најави дека во изработка е и дигитален конзулат, на кој онлајн ќе можат да се добијат потребните документи.
Во периодот од 1 до 15 март, заедно со Министерството за одбрана, ќе бидат попишани лицата што за време на пописот се наоѓаат во служба на Армијата на Северна Македонија, во државата или во странство. Заедно со Министерството за правда ќе се изврши попишување на лицата што за време на пописот се наоѓаат во притвор или на издржување казна затвор во затворите, казнено-поправните установи и воспитно-поправните домови и заедно со Министерството за труд и социјална политика ќе бидат попишани лицата бездомници.
Од денеска Државниот завод за статистика ги почнува обуките за обучувачите што ќе го вршат попишувањето на терен, а за кои веќе беа објавени огласи.
Во меѓувреме, опозициската ВМРО-ДПМНЕ и натаму собира потписи од граѓаните за поништување на Законот за попис. Според опозицијата, пописот треба да биде одложен, пред сѐ поради пандемијата на ковид-19.
Министерот за правда Бојан Маричиќ, заедно со директорот на Државниот завод за статистика Апостол Симовски и директорот на Управата за извршување санкции Марјан Спасовски денеска ќе извршат увид во текот на попишувањето во Казнено-поправната установа „К’шање“, Кумановско.