Шефот на Вишото јавно обвинителство Скопје не споменува име велејќи дека не сака да прејудицира која е обвинителката, но открива дека Стаменковски посочил на „соработничката“ во извинување што го испратил до него за објавени текстови на неговиот портал. Стаменковски, пак, денеска рече дека имал цела група обвинители кои му давале информации
Сашо Рајчев не е единствениот обвинител за кој сопственикот на „Доказ“, Марјан Стаменковски, тврди дека соработувал со него. Во допис до шефот на Вишото јавно обвинителство (ВЈО) Скопје, Мустафа Хајрулахи, тој посочил дека соработувал и со една виша обвинителка.
Хајрулахи ова го открива во изјава за Канал 5 ТВ во која вели дека Стаменковски до него испратил извинување за објавен текст на „Доказ“ и оти во тој допис сопственикот на порталот открива за „соработничката“ од ВЈО Скопје. Која е обвинителката, шефот на ова обвинителство не сака да прејудицира.
„Јас против Марјан Стаменковски и ’Доказ‘ преку Граѓанскиот суд пуштив тужба за навреда. Марјан Стаменковски по однос на законски предвидените норми достави извинување до мене како оштетен по однос на текстовите кои беа објавени на ’Доказ‘ и во известувањето адресирано до мене и мојот адвокат наведе дека соработувал и со една обвинителка од ВЈО. Не сакам да прејудицирам, да одам со претпоставки која би била обивнителката која контактирала лично или преку посредници со Марјан Доказ“,
вели Хајрулахи.
Тој вели дека ако има нешто точно и конкретно во ваквите тврдења на Стаменковски, ќе се поведе конкретна постапка. Дисциплинска постапка, наведува Хајрулахи, би се повела и за обвинителот Сашо Рајчев за кого Стаменковски на јавна седница во Апелацискиот суд пред два дена рече дека бил негов соработник и му давал информации, ако се потврдат наводите.
„Јас сум фрапиран од тоа што го кажа. Не сакам да верувам во тоа дека во неговите наводи искажани на јавната седница на 17 мај има вистина. Не би било ни коректно, ни професионално, ни етички, да клеветиш, да изнесуваш такви непроверени информации, а посебно на таков портал кој важеше за, условно кажано, жолт печат. Не верувам и не сакам да верувам дека наводите на Марјан Стаменковски се вистините, но доколку се докаже вистинитоста на неговите искажани ставови вчера на јавната седница, тогаш кон јавниот обвинител кој беше спомнат од Стаменковски ќе се поведе дисциплинска постапка и ќе се утврди неговата одговорност по однос на наводите“,
вели Хајрулахи.
Стаменковски пред два дена ги изнесе обвинувањата за Рајчев и бараше да биде изземен од постапување во предметот каде тој е осуден на затворска казна од три години и еден месец. За барањето првично требаше да одлучува директниот претпоставен на Рајчев, кој е обвинител во ВЈО Скопје, односно Хајрулахи. Меѓутоа, Хајрулахи се иззема од одлучување бидејќи Стаменковски го спомена неговото име велејќи дека Рајчев му давал информации, меѓу другото, и за шефот.
За изземањето одлучуваше републичкото обвинителство кое, сепак, пресече Рајчев да остане во предметот за Стаменковски.
По одлуката, денеска јавната седница во Апелација продолжи, а на неа Стаменковски спомена и цела група обвинители кои му давале информации.
„Јас не го мразам човекот (Сашо Рајчев)… Тој заедно со една група обвинители ми доставуваа информации“,
рече денеска Стаменковски кој не спомена конкретни имиња.
Инаку, Рајчев тврдењата на обвинетиот ги отфрли како невистинити нагласувајќи дека ниту се познава ниту на каков било начин некогаш контактирал со него.
„Сметам дека барањето (за изземање) е еден од начините да се одолговлекува постапката и да се прават сензации како што се правеа сензации и во текстовите што тој ги објавуваше секојдневно и кои се предмет на оваа кривична постапка“,
рече Рајчев по обвинувањата од Стаменковски.
Дали имало и кој се му биле соработници на сопственикот на парапорталот „Доказ“ и кои биле нарачателите на текстовите можеби ќе покаже вториот предмет што се води во Основното јавно обвинителство Скопје. Очекувањата се и да се дознае потеклото на парите кои беа пронајдени при претрес во неговиот дом, кои како што денеска беше посочено на јавната седница, се во висина од околу 74 000 евра.