Обвинителот најавува дека ќе поднесе тужба и останува на тврдењата дека ниту го познава сопственикот на парапорталот ниту имал каква било комуникација со него
Поради барањето за изземање на обвинителот Сашо Рајчев од предметот за сопственикот на парапорталот „Доказ“, Марјан Стаменковски, Апелацискиот суд Скопје ја одложи денешната јавна седница и закажа нејзино продолжение за 19 мај (петок).
Стаменковски од Основниот кривичен суд е осуден на три години и еден месец затвор за повеќе кривични дела, а во Апелација денеска требаше да се одржи јавна седница за неговата жалба каде што како обвинител се појави Рајчев од Вишото јавно обвинителство Скопје кое е надлежно да ги застапува предметите пред второстепениот суд. Меѓутоа, Стаменковски бараше Рајчев да биде изземен бидејќи тврди дека соработувал со него за текстови објавувани на парапорталот „Доказ“.
Дали Рајчев ќе биде изземен или не, ќе одлучи шефот на ВЈО, Мустафа Хајрулахи, но она што обвинителот денеска го изнесе и во судница и пред новинарите се тврдења дека Стаменковски зборува невистина.
„Сметам дека денешното барање (за изземање) е еден од начините да се одолговлекува постапката и да се прават сензации како што се правеа сензации и во текстовите што тој ги објавуваше секојдневно и кои се предмет на оваа кривична постапка“,
рече Рајчев.
Тој повтори дека воопшто не го познава Стаменковски ниту, пак, тврди, имал лична или каква било комуникација со обвинетиот.
„Ниту го познавам обвинетиот Маријан Доказ, ниту сум имал контакти лични и какви било, ниту сум имал каква било комуникација, така што наводите од негова страна изнесени денеска на денешната седница ги отфрлам како целосно невистинити коишто ги документирав со писмена изјава која што ја доставив до обвинителството и сметам дека денеска даденото барање е еден од начините да се одолговлекува постапката и да се прават сензации како што се правеа сензации и во текстовите коишто тој ги објавуваше секојдневно и коишто се предмет на оваа кривична постапка,
изјави тој.
Во врска со прашањето дали ќе поднесе тужба, имајќи предвид дека тврдењата на обвинетиот Марјан Стаменковски може да се сметаат како клевета, тој одговори потврдно.
„Зедов записник од денеска изнесените невистини против мене и тие невистини кои упатуваат на клевета согласно позитивните прописи претставуваат основа за поднесување на тужба. Така што, да ги прочитам убаво и во скоро време ќе биде тоа изреагирано“,
рече тој.
Стаменковски, претходно во судница, тврдеше дека соработувал со Рајчев на дел од предметите за кои му се суди, односно дека добивал информации од обвинителот вклучително и за шефот на ВЈО, Хајрулахи.
„Барам да се изземе почитуваниот обвинител поради судир на интереси бидејќи, според мои сигурни информации, лицето Сашо Рајчев има праќано информации кои се дел од предметите за што ме судите, но и за предмети за кои претседателот на Вишото јавно обвинителство Мустафа Хајрулахи има барано извинување од мене, но и за други предмети“,
рече Стаменковски.
Првостепената пресуда за сопственикот на „Доказ“ беше донесена на 4 април, а покрај затворската казна тој доби и парична од пет илјади евра и забрана во наредните 10 години да врши дејствија поврзани со делата, односно да регистрира домен за интернет-портал во земјава, а сите досега регистрирани се бришат.
Тој беше прогласен за виновен за пет кривични дела – две за ширење расистички и ксенофобичен материјал и едно дело: уцена, пиратерија на аудиовизуелно дело и злоупотреба на лични податоци.
При претрес во неговиот дом беше запленета документација, електронски уреди, но и сума од околу 90 000 евра. За овие пари, обвинителството се сомнева дека потекнуваат од други кривични дела, па за Стаменковски беше отворен и втор предмет.