По инцидентот, во Битола се одржа и протест против полицијата бруталност, а за в среда е закажан друг протестен марш во знак на поддршка на полицајците
Истрагата ќе покаже дали полицијата ги пречекорила своите овластувања во инцидентот во Битола, порача денеска министерот за внатрешни работи Оливер Спасовски одговарајќи на новинарско прашање – дали ја видел новата снимка од настанот, на која се гледа расправијата со полицијата пред да дојде до физичка пресметка.
„Ја видов таа снимка, како што ја видоа и другите граѓаните. Треба да ги почекаме сите факти и аргументи во однос на кој било настан, па тогаш да носиме суд. Оваа постапка е во истрага и не оправдувам никакво насилство, ниту насилство од страна на припадник на полицијата. Не сакам да генерализирам со оценките за сите припадници на МВР, туку мора да се издвојат оние што не ги почитуваат законските овластувања и да сносат одговорност, но исто така не можам да поддржам насилство кое значи напад на полициски службеник. Напад на полицаец е напад на државата. Барам поддршка од сите да се заштитуваме меѓусебно, и граѓаните и полицијата, бидејќи секогаш кога е тешко, бараме помош од полицијата и затоа треба да имаме таква почит. Овој случај е во рамки на истрага и сите докази ќе бидат обезбедени и врз основа на тоа ќе се носат одлуките“,
рече Спасовски.
На прашањето дали тоа значи дека ќе бидат повлечени дисциплинските постапки и кривичната пријава против еден од полицајците, Спасовски не одговори прецизно, туку рече треба да се почека епилогот од истрагата.
„Случајот е во истрага и затоа не можеме да споделуваме повеќе детали. Тоа се две постапки – дисциплинска постапка за неодговорност на полициските службеници и кривична одговорност којашто се води против еден од полицајците. Најважно е да се утврдат факти и аргументи и врз тоа да се носат одлуки. Во минатото сведочевме многу пати на покренување судски постапки без докази само за пијар во јавноста, но кога се води кривична постапка, мора да се води со факти и аргументи со цел да биде праведна и правична“,
вели Спасовски.
По инцидентот, во Битола се одржа протестен марш под мото: „Стоп за полициската бруталност“ кој го организираа неколку невладини здруженија.
За в среда, пак, се најавува друг протест за поддршка на полицајците. На повикот за протестот на социјалните мрежи е најавено дека ќе се бара повлекување на дисциплинските постапки и кривичната пријава против еден од полицајците бидејќи, како што се вели, тие биле нападнати и неправедно казнети.