Тој потенцира дека не се работи за насилство на етничка основа, туку за изолиран случај, но нагласи дека ниту еден вид насилство нема да се толерира од полициските службеници
МВР преку Одделот за внатрешна контрола поднесе кривична пријава до Обвинителството за гонење организиран криминал против полицаецот од Битола кој крвнички тепаше маж во Битола, за што се дозна од видео што беше објавено на социјалните мрежи.
Исто така, против овој полицаец е покрената дисциплинска постапка и суспензија од работа. И против неговиот колега кој го гледаше тепањето е покрената дисциплинска постапка и е суспендиран од работното место затоа што не презел ништо.
Министерот за внатрешни работи Оливер Спасовски на денешната прес-конференција ја осуди ваквата полициска бруталност и рече дека ваквите дела најстрого ќе се санкционираат.
Тој потенцира дека не се работи за насилство на етничка основа, туку за изолиран случај, но нагласи дека ниту еден вид насилство нема да се толерира од полициските службеници.
„Никој не смее да остане неказнет. Не смее во ниту еден момент да се злоупотребат полициските овластувања. Мора да се преземат сериозни мерки и не смееме да дозволиме никој во вакви поединечни случаи да ги валка угледот и честа на македонската полиција и да ја уриваат довербата во системот“,
рече Спасовски.