За информациите дека инспектор што е поврзан со истрагата дал информации, не на медиумите, туку буквално на познаници и пријатели и дека низ цело Скопје се шират фотографии и разни информации кои може да ја компромитираат истрагата, Спасовски рече дека во изминатиот период имало многу информации, многу шпекулации, политикантства, на сè она што произлегува од целиот овој аспект
Истрагата за убиството на Вања Ѓорчевска и Панче Жежовски не може да ја водиме во медиумите, таа мора да се води во Јавното обвинителство, рече денеска министерот за внатрешни работи Оливер Спасовски одговарајќи на новинарски прашања во кои се бараа дополнителни информации за овие две убиства.
„Со поднесувањето на кривичните пријави целата истрага оди во Основното јавно обвинителство (ОЈО). Сите овие детали се разгледуваат во ОЈО на основа на прибраните податоци или на податоци кои ќе ги прибере Јавното обвинителство. Така да не би можел да споделувам повеќе информации и тоа не е добро за истрагата заради тоа што не можеме да ја водиме во медиумите, таа мора да се води во Јавното обвинителство“,
рече Спасовски на прашањето што се случувало со возилото на Жежовски од моментот кога е земено од него до моментот кога е користено на 27 ноември.
За информациите дека инспектор што е поврзан со истрагата дал информации, не на медиумите, туку буквално на познаници и пријатели и дека низ цело Скопје се шират фотографии и разни информации кои може да ја компромитираат истрагата, Спасовски рече дека во изминатиот период имало многу информации, многу шпекулации, политикантства, на сè она што произлегува од целиот овој аспект.
„Затоа уште повеќе потврдувам дека тоа не е добро. За каква било активност којашто е нелегална и од кого било, дали е инспектор или е кој било друг, секако дека ќе се сноси одговорност доколку постои такво нешто. Меѓутоа, не би сакал на ниво на шпекулации, посебно не за еден ваков случај да зборуваме“,
додаде тој при неговата денешна посета на СВР Куманово.
Спасовски сличен одговор даде и на прашањето околу коментарите на правниците дека со изјавите во кои Палевски се посочува како главен извршител на овие две убиства може да му помогнат во одложување, односно во процесот на екстрадиција во Македонија.
„Кога е во истрага, сите шпекулации и сè она што ќе го изнесуваме во јавноста само може да ѝ штети на истрагата“,
кратко одговори Спасовски.
Без конкретен одговор, повикувајќи се на тоа дека за случајот се води истрага, Спасовски беше и за прашањето дали има нови осомничени, каде што посочи дека за сите детали и информации, кои ќе ги утврди Јавното обвинителство, уверува дека ќе ја информира јавноста.
Прашан дали се обезбедени нови парчиња оружје, односно дали се најдени и дали балистиката покажала дека едно од тие кои веќе ги имаат е користено при извршување на кривичните дела и дали кривичните дела се извршени со едно оружје, Спасовски рече дека сите тие информации и вештачењата ќе бидат доставени до Јавното обвинителство во моментот кога ќе бидат завршени.
На прашањето да даде коментар на наводите на Христијан Мицкоски дека ќе го гони додека е жив доколку победи на изборите следната година, Спасовски настапи со контрапрашање: „Додека е тој жив или јас?“, за потоа да рече: „Изјавата беше дека нема да имам мир додека е тој жив и јас му посакувам долг живот“.
Вчера и Јавното обвинителство апелираше во текот на истрагата да не се шират непроверени информации кои можат да ѝ наштетат на постапката, но и дополнително да ја вознемират јавноста. Повикот од Обвинителството доаѓа откако викендов од медиуми во соседството беа пласирани наводно нови сознанија за случајот, кои беа пренесени во земјава.
Денеска пратеникот во Собранието и член на Извршниот комитет на ВМРО-ДПМНЕ, Драган Ковачки, на прес-конференција рече дека прашањето што вчера го упатија до министерот за внатрешни работи Спасовски можат да го потврдат, односно дека возилото со кое е извршено грабнувањето на Вања било регистрирано на системот „Безбеден град“ на 24 ноември во 6:30 часот и на 25 ноември во 21:15 часот кај скопската населба Маџари.
„Оливер Спасовски ја излажа македонската јавност за два клучни моменти. Прво, дека возилото на убиениот Панче со кое е извршено киднапирањето на Вања не било барано затоа што не знаеле дека и тоа е исчезнато. Ова е лага затоа што возилото е пријавено во СВР Велес како исчезнато, за што постои и официјален запис во МВР. И второ дека возилото за прв пат го наоѓаат на камерите на ’Безбеден град’ на 27 ноември, односно на денот на убиството на Вања. Како што веќе прашавме, а Спасовски одбива да одговори дали е точно дека возилото е регистрирано на системот ’Безбеден Град’ на 24 ноември во 6:30 и 25 во 21:15 кај Маџари, денеска ќе потврдиме дека возилото е регистрирано на системот ’Безбеден град’ во наведените термини и локација, што укажува на уште една лага на МВР Спасовски“,
рече Ковачачки на прес-конференцијата.
Тој, како што кажа, потенцираат дека овој податок го има и Спасовски, „а зошто ја лаже јавноста не знаеме и бараме одговори“
„МВР на Спасовски целосно потфрли и за ова мора да има одговорност. Најмалку сакаме овие информации кои ги објавуваме да се сфатат во насока на некакво партиско политичко препукување. Но, должни сме јавноста и сите граѓани да предупредиме на пропустите во истрагата на министерот Спасовски како и на нивните погрешни информации кои ги соопштуваа, кои доколку не се случеа, убијците на Вања ќе беа откриени и немаше да се случи второто убиство. Очекуваме одговори на нашите прашања“,
кажа Ковачки.
Малолетната Вања и велешанецот Панче беа пријавени за исчезнати на 27 (Вања) и 24 ноември (Панче), а потоа беа пронајдени мртви во близина на Велес и на Скопје на 3 декември.
За нивното убиство засега се осомничени шест лица, од кои пет се во притвор, а првоосомничениот Љупчо Палевски-Палчо чека да биде екстрадиран од Турција.