Според пратеникот од ВМРО-ДПМНЕ, министерот Оливер Спасовски е должен да одговори зошто на прес-конференцијата на 4 декември кажал дека возилото на првата жртва од случајот што ја потресе македонската јавност не било регистрирано во системот на камери
Пратеникот и член на ИК на ВМРО-ДПМНЕ, Драган Ковачки, денеска на прес-конференција рече дека системот „Безбеден град” го лоцирал возилото со кое било киднапирана 14-годишната Вања на 24 и 25 ноември во Маџари и на 27 ноември на најобезбедуваната локација кај хотелот „Александар палас“.
Според него, министерот за внатрешни работи Оливер Спасовски е должен да ѝ одговори на македонската јавност зошто на прес-конференцијата на 4 декември кажал дека возилото на првата жртва од случајот што ја потресе македонската јавност не било регистрирано во системот на камери.
„Неколку дена по ред го прашуваме министерот Спасовски, а тој одбива да одговори за очигледниот и фатален пропуст на МВР чија последица е киднапирањето и убиството на девојчето Вања. Јавно го прашуваме министерот Спасовски дали возилото е регистрирано на камерите пред 27 ноември, односно на 24 ноември во 6:30 часот на влезот во Скопје кај Маџари на мостот кај ‘Агросервис’? Понатаму, дали возилото е забележано од камерите на ‘Безбеден град’ на истата локација и следниот ден, на 25 ноември во 21:15 часот? Конечно, дали возилото е забележано на камерите кобниот ден на 27 ноември во 7:42 часот наутро кај ‘Александар палас’ и Злокуќани и како е можно да тоа возило неконтролирано да помине низ најобезбедуваната локација во Македонија во тој момент, а можеби и во регионот поради непосредните подготовки на Советот на ОБСЕ“,
рече Ковачки.
ВМРО-ДПМНЕ бара одговори како е можно возило кое е пријавено дека е исчезнато пет дена пред киднапирањето на Вања да помине покрај 40 камери на „Безбеден град”, Министерството за одбрана и на други субјекти.